Yanvarniñ 20-nde Ukrayina Donetsk avalimanı qorçalayıcılarını añma kününi qayd ete, bu rusiyeniñ silâlı tecavuzınıñ birinci yılında ukrayin askerleriniñ qarşılıq kösterüvini ve fedakârlığını timsallegen künlerden biridir. Belli etilgen tarihnen beraber yanvarniñ 16-sı da qayd etile, bu kün 2016 senesinden başlap «kiborglarnı» añmaqnıñ resmiy olmağan kününe çevirildi.

Donetsk avalimanınıñ mudafaası 244 kün devam etti – 2014 senesi mayıs 26-ndan 2015 senesi yanvar 22-ne qadar. Aman-aman sekiz ay devamında arbiyler, göñülli askerler, sanitarlar ve göñülliler strategik obyektni daima ateş açuv ve ücüm altında qorçaladılar. İşte, o vaqıtta avalimanı qorçalayıcılarına olarnıñ küçü ve qarşılıq kösterüviniñ belgisi olaraq «kiborglar» demege başladılar.

Eñ facialı künler 2015 senesi yanvar 19-20 künleri oldı. Soñra rusiye tarafdarı küçler Yañı terminalnıñ esas tayançlarını bir qaç kere patlattılar, bunıñ neticesinde avalimanınıñ qatlarara tavanları yıqıldı. Mudafaacılarnıñ bir qısmı yıqıntılar tübünde öldi, bir qısmı esir tüşti. Mudafaa daa bir qaç kün devam etti: ukrayin cenkçileri terminal ve idare qullesi arasındaki yanğın stantsiyasında yanvar 23-ne qadar pozitsiyalarnı tuttılar, soñra tışqa çıqtılar. Bu kün avalimanı içün uruşlarnıñ soñki künü dep sayıla.

Çeşit menbalarğa köre, Donetsk avalimanı içün uruşlarda 100-den 200-ge qadar ukrayin qorçalayıcısı elâk oldı, 440-qa yaqın adam yaralandı. Mudafaacılar arasında Qırımdan kelgen askerler bar ediler – hususan, Valid (Qırım), Oleksandr Balkov, Mikola Andruşçenko (Qırım) ve Denis Bilıy.

Donetsk avalimanı ukrayin qarşılığınıñ birinci timsallerinden biri oldı. Onıñ qorçalanması ukrayin askerleriniñ qararlılığı ve birligi atta çoq kereler duşman küçlerine qarşı turmağa qadir olğanını isbatladı.

Donetsk avalimanınıñ qorçalayıcılarını añma kününde Ukrayina avalimanını, devletimizni, onıñ serbestligini ve suverenitetini qorçalağanlarğa başını ege.