2018 senesi boş ay (noyabr) 29 künü Kıyiv şeerinde Ukraina Silâlı Quvetleri Qomandanlığı ve havfsızlıq ve mudafaa strategiyaları boyunca Halqara merkez tarafından teşkil etilgen Deñiz havfsızlığı meseleleri boyunca II halqara konferentsiya olıp keçti.
Yaqınlarda Keriç boğazında rusiye istilâcılar tarafından ukrain arbiy gemilerine yapılğan ücümni diqqatqa alsaq, vaqtı-vaqtına keçirilgen bu tedbirde Temsilcilikteki halqara alâqalar hızmetiniñ reisi Yevgen Samuha iştirak etti.
Konferentsiyanıñ açılışında yuqarıda qayd etilgen adise, devlet akimiyeti organları oña cevap olaraq yapqan areketleri aqqında malümat ile ve halqara ortaqlarğa RF-na sanktsion basqını quvetlerştirmek ve Rusiye ile teñ olmağan küreşte Ukrainağa ciddiy şekilde qol tutmaq muracaatı ile Ukraina Silâlı Quvetleri Arbiy-deñiz Quvetleriniñ Komandanı İgor Voronçenko ve Ukraina Yuqarı Şurasınıñ çetel işler boyunca Komitetiniñ başlığı Ganna Gopko çıqışta bulundılar, Ukrainada Büyük Britaniyanıñ Fevqulâde ve Vekâletli Elçisi Cüdit Gof, Ukrainada AQŞ-nıñ Fevqulâde ve Vekâletli Elçisi Mari Yovanovıç ve Ukrainada NATO Temsilciliginiñ reisi Oleksandr Vinnikov ise RF-nıñ deñizdeki tecavüzini takbih etip, Ukrainağa tolu şekilde siyasiy qol tutuvlarını bildirdiler.
Şimdiki vaziyetni köz ögüne alaraq, panel munaqaşası devamında Qara ve Azaq deñizlerinde zemaneviy telükeler ve olarnı çezüv yolları, havfsızlıq muitinde deñişmelerniñ içtimaiy-siyasiy ve iqtisadiy aqibetleri ve regiondaki NATO siyaseti kibi muzakere etilgen mevzular Ukrainada küçlü arbiy-deñiz quvetlerini şekillendirüv, Avropa-atlantik Alyansı ile arbiy-deñiz saasında ameliy uyğunlıq kibi maqsatlarğa irişmege niyetlengendir.
Konferentsiyada sabıq Ukraina Baş Naziri (1995-1996), Ukraina havfsızlıq Hızmetiniñ Reisi (1991-1994), Ukraina mudafaa Naziri (2003-2004) Yevgen Marçuk, Ukraina halq deputatı, 2014 senesi Donetsk vilâyeti devlet memuriyetiniñ yolbaşçısı Sergiy Taruta, ‘‘Çetel işler Maydanı’’ Fondu közetüv şurasınıñ yolbaşçısı Andriy Klımenko, Büyük Britaniya mudafaa Akademiyasında Qırım meseleleri boyunca mütehassıs Debora Sanders, AQŞ Arbiy-deñiz Quvetleri komandanlığınıñ Avropa ile Afrikada temsilcisi, Qara deñiz regionı meseleleri boyunca mütehassıs Nensi Lakore, Büyük Britaniya Qırallığı Arbiy-Deñiz Quvetleri komandanlığında ştab müdiri Yen Lover çıqışta bulundılar. Bundan da ğayrı, tedbirde Ukrainadaki çetel temsilciliklerdeki arbiy bölüklerniñ vekilleri, yerli arbiy ekspertler ve halqara deñiz uquqı boyunca mütehassıslar iştirak etti.
