2018 senesi ilk qış (dekabr) ayı 26 künü Milliy Havfsızlıq ve Mudafaa Şurasınıñ toplaşuvında Ukraina Prezidenti Petro Poroşenko Azaq deñizindeki buhran apansızdan yüz bermegenini qayd etti. Ukraina defalarca rusiyelilerniñ provokatsion areketlerine, regiondaki kerginlikniñ artuvına, rusiyelilerniñ Azaq deñizini öz içki deñizine çevermek ıntıluvlarına ortaqlarınıñ diqqatını celp etken edi.

”Kimerde, bunı açıq-aydın aytmağa isteyim, ortaqlarımığa obyektiv malümat bergenimizge baqmadan, dostlarımıznıñ bir qısımı sañki telükelerge tolu derecede qıymet kesmey edi. Telükelerni büyütmedik. Yalıñız Rusiyeniñ tecavüziy areketlerinen Ukrainanıñ, bunı qayd etmek isteyim, cenk vaziyetini ilân etüv şekilindeki yeterli cevabı bu meselege bütün dünya diplomatlarınıñ lâyıq diqqatlarını celp etti”, – dep qayd etti devletimizniñ Başlığı.

Prezident aytqanına köre, arsız, sebepsiz tecavüzniñ ve ukrain deñizcilerini zap etüvniñ birinci saatlarından başlap, bütün dünya Ukrainanıñ tarafını aldı, tek bazı ukrain siyasetçileri ”Ukraina ne içün öz mustaqilligini ve topraq bütünligini qorçalay, ne içün Keriç boğazınıñ işğal etilüvine qarşı küreşe ve anda öz gemilerini yollay” kibi suallerni berdiler. ”Qanatlarımıznı büküp, işğalni tanımaq, topraqlarımıznı RF-na bermek kerek ekenmiz”, – ayrı siyasetçiler bunı yapmağa teklif eteler. Nafile beklemeñiz. Ukrainalılarnıñ ekseriyeti barışıqnıñ tarafdarıdır. Amma Ukrainanıñ milliy menfaatlarına hızmet etken barışıqnıñ. Ukrainanıñ milliy menfaatlarına degil de, öz saylav niyetlerine esaslanıp, ukrainalılarnıñ kün tertibine bazı siyasetçiler tarafından teklif etilgen teslim etüv şartı ile barışıqnıñ degil. Şunı hatırlatmağa isteyim – biz buña yol bermemiz”, – dep qayd etti Petro Poroşenko.

Onıñ sözlerine köre, Havfsızlıq Şurası, BMT Baş Assambleyası, NATO, AHİT, Avropa Şurası, Avropa Parlamenti, Avropa Birligi ve ”Büyük yedilik” meydançıqlarında ukrain tarafı öz milliy menfaatlarını qorçalaycaqtır. ”Bunı bir kere daa qayd etmege isteyim: cenk vaziyeti ile beraber bu qol tutuv ve halqara ortaqlarımıznıñ muayyen areketleri, olarnıñ Kremlge basqısı – bunı şimdi açıq-aydın ayta bilem – RF tarafından planlaştırılğan eñ yaramay stsenariyni toqtattılar. Bizim arbiylerimiz, diplomatlarımız beraberlikte Putinge yañı ”qırmıznı çizgini” kesmege bermediler”, – dep ayttı o.

Prezident Ukrainanıñ NATO-ğa yaqınlaşmaq ıntıluvını Esas qanunda pekitmek teşebbüsi aqqında hatırlattı. ”Tek NATO limanına Ukraina lengerini attırıp, Kremlni ukrain yönelişinde vaziyetni qozğalamaq niyetinden marum etermiz”, – dep qayd etti o. Devlet Başlığı bu qarar ukrain qanuniyeti seviyesinde Yuqarı Şurasınıñ nevbetteki toplaşuvında pekitilecegine ümütini bildirdi. O, AB ve NATO azalığına Ukraina alğan yolnı Esas qanunda pekitmek maqsadınen kiçik ayda parlamentke muracaat etecegini bildirdi.

“Bundan evel aytqanım kibi, ukrain siyasetçilerine baqqanda, halqara cemiyet Keriç boğazındaki vaqiağa bir ağızdan qıymet kese. Ukrain cemiyetine rusiye propagandasınıñ tesir etüvine yol bermem. Mesele, yazıqlar olsun ki, yalıñız akimiyet yaramay çalışqanınen bağlı degil. Bizim muhalifetimiz Putin ile bir sesnen yırlağanı, Kremlniñ emirlerini seslendirgeni, katerlerimizge yapılğan ücüm içün mesüliyetni Rusiyeden Ukrainanıñ boynuna asmağa ıntılğanı meni kerçekten şaşırta. Yazıqlar olsun ki, bunı tek akimiyetni er vaqıt qabaatlağan muhalifetniñ qısımı, beşinci kollonası yapmay. Yazıqlar olsun ki, bunı daa yaqınlarda ”Avropalı Ukraina” birliginde olğan arqadaşlar da yapa”, – dep qayd etti Prezident.

Bundan ğayrı o, Rusiyede Volokolamsk adlı şeer olğanını, bu şeerde biñ sene evelsi gemilerni bir özenden başqa özenge sürüklenip taşılğanını ve şeer bu sebepten böyle ad alğanını hatırlattı. ”Bir muhalifetçimiz ahır-soñu ukrain Keriç-Yenikale kanalını, ya da Keriç boğazını qullanuvdan vazgeçip, öz arbiy gemilerimizni Qara deñizden Azaq deñizine sürüklep taşıycağımıznı tefsiye etip başladı. İşbu teklifni bizge tek Kreml degil de, öz muhalifetimiz de yapacaq ola”, – dep qoştı Prezident.

”Bunı qattı ve qandırıcı şekilde qayd etmege isteyim: Ukraina iç bir vaqıt Azaq deñizindeki limanlarını arbiy gemileri tarafından qullanuvdan vazgeçmez. Aqiqat bizim tarafımızda, halqara uquq bizim tarafımızda. dünyanıñ qol tutuvı bizim tarafımızda, bunıñ içün biz bütün siyasiy-diplomatik vastalarnı işletirmiz”, – dep qayd etti devlet Başlığı.

Prezident, Milliy Havfsızlıq ve Mudafaa Şurasınıñ azalarında devletni qorçalav içün bütün mesüliyet olğanını hatırlattı. Yalıñız egemenlikni qorçalav degil de, vatandaşlarnıñ havfsızlığını qorçalavdır. ”Ukraina Silâlı Quvetleri ile başqa silâlı hızmetler tarafından qorçalanğan vatandaşlar havfsızlıqta bulunğanlarını is etmeliler”, – dep qayd etti o.