Ukraina Prezidenti Petro Poroşenko Kanada Premyer-ministri Castin Trüdo ile körüşüvi devamında havfsızlıq ve mudafaa saalarındaki işbirliklerini eyileştirecek Ukrainanıñ yañı teşebbüslerini taqdim etti.

‘‘Bügün men, havfsızlıq ve mudafaa saalarındaki işbirliklerimizni eyileştire bilecek Ukrainanıñ yañı teşebbüslerini taqdim ettim’’, – dep bildirdi matbuat vastalarınen körüşüvi devamında Petro Poroşenko.

Ukraina devletiniñ başlığı bu seneniñ başında arbiy saasındaki işbirligimizni qolaylaştırğan  mudafaa saasında işbirlik boyunca eki taraflama añlaşma imzalanğanını hatırlattı. Bundan da ğayrı, bu sene Kanada ukümeti Kanada talimatçıları tarafından bizim Arbiy Hızmetlerimizge talimat bergen UNIFIER arbiy ameliyatını devam etti.

”Men bellesem, böyle güzel temelge esaslanıp, ilerige areket etmege vaqıt keldi”, – dep qayd etti Petro Poroşenko.

Ukraina Prezidenti, Kanada Premyer-ministri Trüdoğa ve Kanada ukümetine Rusiye istilâsı şaraitlerinde Ukrainanıñ bağımsızlığı, mustaqilligi ve territorial bütünligine qoltutqanları içün öz teşekkürini bildirdi.

İttifaqdaş ve ortaqlarımıznıñ böyle printsipial nazar noqtaları, siyasiy ve sanktsiya şekilindeki basqınıñ devam etmesi, Kanadanıñ halqara sanada birinciligi, zorbalıqnen sıñırlarnı deñiştirmek maqsadınen Moskova tarafından kerçekleşken cenkni toqtatmaq içün pek muim’’, – dep qayd etti devletimizniñ başlığı.

Petro Poroşenko aytqanlarına köre, Kanadanıñ G7-de yolbaşçılığı sayesinde, bu memleket Ukraina ve Avropada barışıqlıqnıñ temin etilüvinde daa muim rol oynay bile. ‘‘Köremiz ki, G7 platforması da Qırımnıñ işğalden azat etilüvinen oğraşqan halqara dostlar gruppasınıñ areketlerine qol tuta. Eminim ki, Kanada bu rol içün bütünley kelişe, çünki Qırım meselesi, ilk nevbette, insan aq-uquqları ve serbestlikleri ile bağlı.

Prezident qayd etkenine köre, diplomatik faaliyet Ukrainanıñ qaviy iqtisadiy ve mudafaa saasındaki  metaneti ile pekitilmeli.

Öz nevbette, arbiy yardım aqqında suallerge cevap bergen Castin Trüdo qayd etti ki, beraberlikte yapılacaq vazifelerniñ cedveli ve şekili belli. ‘‘Qanunsız Rusiye istilâsına ve Ukrainada vaziyetni kerginleştirmege Rusiyeniñ ıntıluvlarına qarşı Ukrainanıñ kureşine daima qol tutacaqmız. Biz bunınen şimdi de kureşemiz’’, – dep qayd etti Kanada Premyer-ministri.

Bundan da ğayrı, Castin Trüdo Kanada idmancıları Ukraina arbiylerinen öz tecribesinen paylaşqanını hatırlattı.