AQŞ Prezident yardımcısı Maykl Pens ile telefon subeti devamında Ukraina devletiniñ başlığı Donbassta bügünki vaziyet ve Rusiyeniñ nezareti altında bulunğan aydutlar tarafından yapılğan provokatsiyalar aqqında haber etti. Bu munasebet ile Petro Poroşenko Minsk añlaşmalarındaki mecburiyetlerini tolu şekilde yerine ketirmegence Rusiyege qarşı basqını devam etmege kerek olğanını qayd etti. O, AQŞ Prezidenti D. Trampqa Rusiyege qarşı mütenasip sanktsiyalarnıñ devam etmesi aqqında yaqınlarda qabul etken qararı içün öz teşekkürini bildirdi.

Prezident yardımcısı Pens Rusiye Minsk añlaşmalarındaki mecburiyetlerini tolu şekilde yerine ketirmegence ve Qırımnı Ukrainağa qaytarmağance sanktsiyalarnı devam ettirmege muim olğanını bildirip, AQŞ Ukrainanıñ öz territorial bütünligi ve egemenligi içün küreşine qol tutmağa devam etecegini qayd etti. O, Ukraina islâat saasında ilerilegenini de belgiledi.

Prezident Poroşenko Ukrainada kütleviy içki islâatlarınıñ keçirilüvine muntazam şekilde qoltutqanı ve rusiye istilacısına tenbi olaraq devletimizge arbiy yardım köstergeni içün Amerika Qoşma Ştatlarına teşekkür bildirdi.

Petro Poroşenko ile Maykl Pens devletlerimizniñ arasındaki eki taraflama ticariy-iqtisadiy işbirlikniñ faal şekilde inkişaf etkenini qayd ettiler. Bundan da ğayrı, nevbetteki yüksek seviyede eki taraflama munasebetlerniñ cedveli belgilendi. Malüm olğanı kibi, bu sene ukrain-amerikalı strategik işbirliginiñ başlağanına 10 yıl tolacaq.