Oktyabr 19-20 künleri Avropa Şurasınıñ «Devlet içinde köçken insanlarnıñ aq-uquqlarını qorçalavı» Proyekti Yaponiya elçiliginiñ qoltutuvı ile «Devlet içinde köçüvniñ 3 yıllığı: integratsıyanıñ qıyınlıqları ve muvafaqiyetli tecribeleri» adlı forumnı keçirdi. Merasimde Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov iştirak etti. Forumnıñ  maqsadı – iştirakçilerge malümat ve tecribenen paylaşmağa imkân bermek, devlet içinde köçken insanlarnen çalışıp olarnıñ qabul etken cemiyette integratsıyasına hızmet etken teşkilâlarnıñ birleşüvine yardım etmektir.

Oturışlarınıñ mevzularına binaen, forum iştirakçileri nevbetteki saalarda tecribelerinen paylaştı: medeniyet ve maarif faaliyetleri yardımınen integratsiya, içtimaiy hızmetler ve ruhiy qoltutuv yolunen integratsiya, devlet içinde köçken insanlarnı işke yerleştirüv ve qabiliyetlerini inkişaf ettirüv yolunen integratsiya. Bundan başqa, «Devlet içinde köçken insanlarnıñ integratsıyası ve devlet içinde avuşuvnen bağlı uzun müddetli qararlarnıñ 2020 senesine qadar strategiyası» taqdim ve muzakere etildi.

Çıqışta bulunğan İzet Gdanov forum iştirakçilerini devlet akimiyetiniñ esas teşkilâtı olğan Ukraina Prezidentiniñ Qırım Muhtar Cumhuriyetindeki Daimiy Temsilcilikniñ vaqtınca işğal etilgen Qırım toprağında yaşağan ya da qıta Ukrainağa köçmege mecbur olğan Ukraina vatandaşlarınıñ aq-uquqları qorçalavınen bağlı faaliyeti ile tanıştırdı.

Bu cümleden, merasimde bulunğan devlet akimiyeti temsilcilerniñ ve meselenen oğraşqan başqa teşkilât ve zatlarnıñ diqqatları işbu vatandaşlarnıñ aq-uquqları ve qanuniy menfaatlarını qorçalavında kompleksli ve keliştirilgen areketlerniñ müimligine çekildi.

Bundan da ğayrı, forum iştirakçileri Qırım işğalini toqtatmaq maqsadınen Rusiye Federatsiyasına halqara sanktsion basqısını devam ettirmege halqara cemiyetine muracaatta bulundı.