Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin Ukrainanıñ deñiz iqtisadiy zonasında ve Ukrainanıñ qıtası ve Qırım yarımadası arasındaki raflarda yerleşken Arhangelsk, Odessa, Ştormovoye gaz membalarında ve Golitsınske kondensat-gaz membasında Ukraina Devlet sıñır hızmetiniñ Deñiz saqçıları tarafından teşkil etilgen teşkerüv tedbirlerinde iştirak etti.

Teşkerüv sentyabr 6-8 arasında ”Naftogaz Ukrainı”, ”Çernomornaftogaz” şirketleriniñ, uquq qorçalav ve icra akimiyet organlarınıñ, matbuat vastalarnıñ temsilcileri iştiragi ile Ukraina Devlet sıñır hızmetiniñ ”Grigoriy Kuropyatnikov” gemisi vastasınen keçirildi.

Sefer devamında Ukrainağa ait olğan ve Ukrainanıñ devlet bayrağı altında bulunğan gemilerde ve yapılarda qanunsız şekilde işletilgen RF-nıñ işaretleri qoyulğanı, statsionar yapılarda Ukraina Devlet sıñır hızmetiniñ gemisine qarşı tecavuziy areketler yapqan RF-nıñ askerleri bulunğanı, RF-na boysunğan teşkilâtlar tarafından Ukrainadan kerekli ruhset almadan burğu işleri qanunsız şekilde yapılğanı qayd etildi. RF-nıñ askerleri ve RF-na boysunğan teşkilâtlar radiodeñişüv, qurtarıcı vastalarnı işaretlendirüv ve qıtasal raflar etrafında hafsızlıq zonalarnı teşkil etilüvi boyunca halqara deñiz uquqnı bozğanları tasdıqlandı.

Uquq bozucılarğa bozuluvları aqqında mütenasip şekilde haber etildi, ameldeki qanuniyetke köre bozuvlar aqqında Akt tertip etildi ve RF Qaradeñiz flotunıñ gemisine de bozuluv aqqında bildirildi.

Toplanğan malümat Qırım MC qanunsız işğali boyunca halqara mahkeme ve arbitraj (tahkim) ceryanlarında, cinayetler boyunca milliy taqıqatlarda ve başqa uquqiy tedbirlerde işletilecek.

Ukraina Prezidentiniñ avaleleriniñ yerine ketirilüvi çerçivesinde yuqarıda qayd etilgen ceryanlar Ukraina Prezidentiniñ Qırım Muhtar Cumhuriyetindeki Daimiy Temsilcisiniñ mahsus nezareti altında bulunacaq.