2018 senesi fevral 13 künü Ukraina Prezidentiniñ Qırım Muhtar Cumhuriyetindeki Temsilciliginiñ vaqtınca işğâl etilgen topraqlardan köçken vatandaşlarnen çalışqan hızmetniñ baş mesleatçısı İrina Mihalçuk, işğalniñ 4-yıllığına bağışlanıp Dnipro şeerindeki Ukrainada Golokost ve yeudi halqınıñ hatırası müzeyinde olıp keçken tedbirde iştirak etti. Merasimde sabıq siyasiy mabüs, Qırımtatar halqı Milliy Meclisiniñ reis muavini İlmi Umerov; Ukrainada Kanada elçihanesiniñ siyasiy ve içtimaiy meseleri boyunca mesleatçısı Ruslan Kats; Qırım eviniñ programma müdiri ve ‘‘Mustafa Cemilev. Boysunmağan’’ serlevalı kitapnıñ müellifdeşi Alim Aliyev; ‘‘Ukrainska pravda’’ neşriyatınıñ baş muarriri, ‘‘Mustafa Cemilev. Boysunmağan’’ serlevalı kitapnıñ müellifdeşi Sevgil Musayeva iştirak ettiler.

İlmi Umerov öz çıqışında Qırımnıñ işğalci memleket tarafından vaqtınca işğalini başlatqan ve esas insan aq-uquqlarınıñ kütleviy şekilde bozuluvına ketirgen 2014 senesi fevral ayınıñ facialı vaqialarını tarif etti. O, insan aq-uquqları ve serbestlikleri bozulğanı, adamlar qanunsız şekilde yaqalanğanı ve hırsızlanğanı, qırımtatarlarğa, faalcilerge ve jurnalistlerge qarşı zorbalıq yapılğanı, Ukrainanıñ bütünligine qoltutqan yerli sakinler ve umumen Qırımnıñ ealisi kütleviy şekilde qorqutılğanınen bağlı rezonanslı işler aqqında hatırlattı.

Bundan da ğayrı, işbu merasimde jurnalist Anton Naumlükniñ ‘‘Qırımnıñ büyügen balalığı’’ serlevalı fotosergisi açıldı ve demokratik ruhnıñ qaramanı ve qırımtatar halqnıñ aqiqiy lideri aqqında ‘‘Mustafa Cemilev. Boysunmağan’ serlevalı kitap taqdim etildi.