2025 senesi iyünniñ 26-nda ML Bhartia Auditorium в Alliance Française de Delhi salonında İndistan Cumhuriyetindeki Ukraina Elçihanesi ve İndistan Cumhuriyetindeki Romaniya Elçihanesi yardımınen, Temsilcilik ile ortaqlıqta işbirlikte Qırımtatar Bayrağı Künü munasebetinen “Haytarma” filminiñ mahsus kösterilüvi olıp keçti. Filmden soñ, Ukrainanıñ İndistandaki Fevqulâde ve Salâhiyetli Elçisi Oleksandr Polişçuk ve İndistandaki Romaniyanıñ Fevqulâde ve Salâhiyetli Elçisi Sene Latif jurnalist ve kino tenqitçisiniñ iştiraki ile munaqaşa keçirildi.
Tedbirge onlayn şekilde qoşulğan Daimiy Temsilci Olga Kurışko İndistan Cumhuriyetindeki Ukraina Elçihanesine Qırımtatar Beyraq Kününe bağışlanğan tedbir teşkil etkenleri içün teşekkür bildirip, Qırım tamır halqınen birlik ve birdemlikniñ müimligini qayd etti. O, qırımtatar halqınıñ milliy bayrağınıñ tarihiy miras, devletçilik ve menlik timsali olğanını ifade etti.
“Bugün, devam etken rus işğali şaraitindei halqara uquqnıñ bozuluvları ve Qırım topraqlarınıñ qullanılması qayd etilgendei bu bayraq tirenüv, umut ve metanetniñ quvetli timsali oldı. O, tek qırımtatarlarnı degil, serbestlik, insan aqqları ve adalet içün küreşken er kesni birleştirdi”, — dep, ayttı Olga Kurışko.
Daimiy Temsilci “Haytarma” filmi areketke çağıruv, adaletke işanç ve umumiy kelecekke ümütniñ timsali ola. Öz muracaatında o, halqara toplulıqnıñ birdemligi ve sarsılmaz destegi içün minnetdarlığını bildirip, qırımtatar halqı ve Ukrainanıñ azatlıq oğrunda küreşine qol tutmağa çağırdı.
Panel müzakeresi vaqtında Romaniyanıñ İndistandaki Fevqulâde ve Salâhiyetli elçisi Sena Latif, öz qoranta hatıralarınen ve şahsiy ikâyelerinen paylaştı, Romaniyadaki qırımtatar diasporası aqqında söz yürsetti, miras, dayanıqlıq ve aitlik duyğusınıñ müimligini qayd etti. Tedbirniñ esas mesajı da açıq-aydın şekilde ifade etildi: Qırım – Ukrainadır, qırımtatar halqınıñ sesi eşitilmek kerek.
Tedbirniñ musafirleri filmniñ rejissörı, baş rolüni icra etken ve al-azırda Ukraina Silâlı quvetlerinde arbiy hızmet köstergen Ahtem Seytablayevniñ video muracaatını seyir ettiler.
Hatırlatamız, “Haytarma” – asıllı qırımtatar olğan ukrain rejissörı Ahtem Seytablayevniñ tarihiy draması. Film 1944 senesi qırımtatar halqınıñ sürgünligine bağışlana ve “Ecnebiy tilde eñ yahşı film” kategoriyasında “Oskar” mukâfatına Ukrainanıñ resmiy namzetı oldı. “Haytarma” arbiy tarihiy filmi 18 mayıs 1944 senesi Stalin rejimi tarafından faşistlerden azat etilgen Qırımdan qırımtatar halqını zorbalıqnen sürgün etüv faciasınıñ vaqialarını köstere.
Tedbir İndistan Cumhuriyetindeki Ukraina Elçihanesi, İndistan Cumhuriyetindeki Romaniya Elçihanesi, Ukraina Prezidentiniñ Qırım Muhtar Cumhuriyetindeki Temsilciligi, Qırım platforması, ATR telekanalı, “Qırım evi” devlet muessisesi , “Crimea Daily” media teşebbüsi ve Alliance Française de Delhi tarafından alıp barılğan ortaq areketler sayesinde teşkil etildi.
“Haytarma” filmi kösterişiniñ teşkilâtçılarına Qırımtatar Bayraq Kününi qayd etmege ve halqara seyircilerni tamır qırımtatar halqınıñ medeniyetinen tanış etmege imkân yaratqanları içün minnetdarlığımıznı bildiremiz.