Tünevin Temsilcilik Ukraina milliy tarih müzeyinen birlikte ve Ukrainadaki AB Temsilciliginiñ desteginen Akim Galimovnıñ “Qırımnıñ aqiqiy tarihı” vesiqalı filminiñ numayışı vesilesinen diplomatlar içün tedbir teşkil etti. Tedbirde Kanada elçisi Natalka Tsmots, İndoneziya elçisi Arif Muhammad Basalamah, Azerbaycan elçisi Seymur Gurbanoglu Mardaliyev, Ukrainadaki AB Temsilciliginiñ vekili Remi Düflo ve diger diplomatik temsilciliklernin vekilleri, şu cümleden Türkiye, Albaniya ve Çehiya, Estoniya, Frenkistan, Almaniya, Büyük Britaniya, İrlandiya, Letoniya, Poloniya, İndoneziya, Sloveniya ve Slovakiya temsilcileri iştirak etti.
İştirakçiler “Qırım hazineleri. Qaytaruv” sergisiniñ ekskursiyasına qoşuldılar ve Akim Galimovnıñ “Qırımnıñ aqiqiy tarihı” vesiqalı filminiñ qısqartılğan variantınıñ numayışında bulundılar. Filmniñ maqsadı – seyircilerni Qırımnıñ aqiqiy tarihınen tanıştırmaq ve rus propagandasınen müstemlekecilik siyaseti Ukraina tamır halqlarınıñ özgünligini ve medeniyetini nasıl etip yoq etkenini aydınlatmaqtır.
“Qırım hazineleri. Qaytaruv” sergisine Qırım müzeylerinden 565 eksponat ve 2000-den ziyade müzey eşyaları kirsetildi. Qırım rusiye tarafından işğal etilgende bu eksponatlar Amsterdamda bulundı. Aman-aman 10 yıl devamında memleketimiz olarnı qaytarmağa tırıştı, bir yıl evelsi Felemenk Yuqarı Mahkemesi serginiñ kollektsiyasını Ukrainağa qaytarmağa qarar çıqardı. Eksponatlarnıñ qaytarılması halqara ve ukrain uquqçıları, devlet akimiyeti vekilleri, Felemenkniñ Ukrainadaki elçiliginiñ ortaq ğayreti sayesinde kerçekleşti.
Sergide diplomatlar skif ve sarmat medeniyetine ait eserlerni, şu cümleden meşur “skif altınlarını”, çeşit devirlerde Qırımda yaşağan halqlarnıñ qadimiy eykellerini, savut-sabalarını ve ev eşyalarını kördiler.
Ukraina milliy tarih müzeyiniñ baş müdiri Fedir Androşuk, Daimiy Temsilci Tamila Taşeva, AB Temsilciliginiñ vekili Remi Düflo, kinoprodüser Hanna Yurlovskaya tedbirniñ başında açılış sözlerinen çıqışlarda bulundılar.
Hususan, Daimiy Temsilci bularnı qayd etti:
Qırımda olıp keçken şeyler aqqında aqiqatnı yetkizmek, rusiyeniñ Qırım ve onıñ mensüpligi aqqında yalan miflerini yoq etmek – böyle leyhalar yaratılmasınıñ esas maqsadıdır, olarnı biz başqa memleketlerge de köstermek kerekmiz.
Sergi ve vesiqalı filmniñ numayışından soñ filmniñ prodüseri Hanna Yurlovskaya, tarihçı Oleksiy Savçenko, Qırım tedqiqatçısı ve tarihçısı Gülnara Abdulayeva iştiraginen münaqaşa da olıp keçti.