Tedbir ”Qırım yarımadasınıñ demografik terkibini zorbalıqnen deñiştirüv siyaseti” mevzusına bağışlanğan edi.

Anton Korınevıç Qırımdaki demografik deñişmeler meselesi pek müim olğanını qayd etti:

”Bu deñiştirüv Rusiye Federatsiyası vaqtınca işğal etilgen topraqlarda muntazam sürette alıp barğan siyasettir. Temsilcilik, müim qısmı ”Qırımnı işğalden azat etüv ve ğayrıdan integrasiya etüv strategiyası” olğan milliy qanuniyetke esaslana, anda demografik terkibni zorbalıqnen deñiştirüv, şübesiz ki, eñ müim meselelerden biri olmaqta. Rusiye Federatsıyası Qırımda işğalci akimiyetke boysunmağan vatandaşlarnı sıqıştırıp, olarnıñ yerine işğalci Rusiye akimiyetine sözde ”qol tutqan” ealiniñ qısmını arttırmaq maqsadınen yarımadağa RF vatandaşlarınıñ avuşmasına yardım ete.

Çıqışta bulunğan Anastasiya Martınovska, Mıkola Kikkas ve Katerına Raşelevska İnsan aqları regional merkezi adından vaqtınca işğal etilgen Qırım yarımadası topraqlarında demografik terkipni zorbalıqnen deñiştirüvge dair tedqiqatlarını taqdim ettiler. Tedqiqat taqip etüv siyaseti, işğalci akimiyet tarafından idare etilgen Qırım yarımadasından insan gruppalarını avuştıruv ve müstemlekecilik siyaseti – Rusiyege qol tutqan insanlarnı RF topraqlarından vaqtınca işğal etilgen Qırım Muhtar Cumhuriyeti ve Aqyar şeeri topraqlarına avuştıruv kibi meselelerni aydınlata.

Tedqiqatnıñ tafsilâtlı metini bu yerdedir: https://zn.ua/ukr/UKRAINE/469525.html

Avuştıruv ve müstemlekecilik siyasetinde Rusiye Federatsiyası tarafından işletilgen aletler:

• vaqtınca işğal etilgen topraqlarda işğalci akimiyetniñ qanunlarını ve uquqiy ameliyatlarını işletüv
  
• kütleviy şekilde pasportlaştıruv
  
• arbiyleştirüv
  
• çeşit türlü ayrımcılıq
  
• söz serbestliginiñ yoqluğı
  
• cemiyette tamğalama
  
• insan ayatınıñ bütün saalarında propagandacılıq
  
• boysunmağanlar maküm etüvnen ve taqip etüvnen cezalana ya da qorqutıla

Ealiniñ demografik terkibini zorbalıqnen deñiştirüv halqara gumanitar uquq ve insan aqları saasındaki halqara uquq şartlarınıñ ciddiy bozulması sayılmaqtadır. Yuqarıda qayd etilgen arbiy cinayet ve insaniyetke qarşı cinayetler vaqtınca işğal etilgen Qırım Muhtar Cumhuriyeti ve Aqyar şeeri topraqlarında insan aqlarını qorçalav ve ğayrıdan tiklev ceetinden ciddiy problemler yaratmaqtadır.

 Ukraina çetel işler Nazirligi / MFA of Ukraine RCHR – İnsan aqları regional merkezi National Endowment for Democracy.ortaqlarımızğa beraberlikte azırlanğan mündericeli tedbir içün minnetdarlığımıznı bildiremiz.