Ukrainağa resmiy ziyaret ile Estoniya Cumhuriyetiniñ Prezidenti Kersti hanım Kalyulayd kelip çıqtı. Ziyaret esnasında Ukraina Prezidenti Petro Poroşenko Ukrainağa qarşı Rusiya istilâsınıñ birinci künlerinden başlap Estoniyanıñ bu meselede qattı noqtaiy-nazarını ve halqara teşkilatlarında, bu cümleden, BMT-da Ukrainağa qol tutqanını qayd etti. ‘‘Estoniya müellifdeşimiz oldı ve bütün rezölütsiyalarımızğa qol tuttı’’, – dep ayttı o.

Estoniya Prezidenti qayd etti ki, Qırımnıñ qanunsız ilhaqı ve Ukraina Şarqındaki rusiye istilâsı toqtatılmalı ve vaziyet halqara uquqnıñ çerçivelerine qaytarılmalıdır. Em de o, Ukrainağa qarşı rusiye tecavüzi bütün Avropa içün gumanitar mesele olğanını bildirdi. ‘‘Ukrainalılarğa Qırımda ve Ukraina Şarqında yardım etken Estoniya cemaat teşkilâtlarına da teşekkürimni bildrimek isteyim’’, – dep ayttı Kersti Kalyulayd. Em de o qayd etti ki, bir çoq eston cemaat teşkilâtları Ukrainadaki vaziyetni 2014 senesi istilânıñ taa başından meseleni doğru añlamağa yardım ettiler.

‘‘Bunı resmiy şekilde qayd etmege isteyim – em avropalı ortaqlarımıznen, em de amerikalı ortaqlarımıznen bütün halqara muzakerelerde işğal etilgen Qırımda ve rusiye apishanelerinde RF tarafından maküm etilgen ukrain reinelerniñ eñ yaqın vaqıtta azat etilüvi meselesini köteremiz’’, – Estoniya Prezidenti ile beraberlikte keçirgen körüşüv devamında Rusiyede siyasiy mabuslarını azat etmek içün neler yapqanını sorağan matbuat vastalarınıñ temsilcilerine cevap berer eken, dep qayd etti Ukraina Prezidenti Petro Poroşenko.

Ukraina devletiniñ başlığı qayd etkenine köre, bu mesele Estoniya Cumhuriyetiniñ Prezidenti Kersti Kalyulayd ile körüşüv esnasında da muzakere etildi ve eki devletniñ areketleri uyğunlaştırıldı. ‘‘Reinelerni azat etüv – Misk añlaşmalarınıñ bir qısımıdır, buña köre Rusiye reinelerni azat etüv mecburiyetini doğrudan-doğru öz boynuna alğan edi. Söz Suşçenko, Sentsov, Kolçenko, qırımtatarlar, ukrain askerler, yani bir çoq vatandaş aqqında yürsetile. Biz iç kimseni unutmaymız’’, – dep qayd etti Prezident.