2018 senesi ekim (oktâbr) ayı 23 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Valeriya Pahomova Frenkistannıñ Ukrainada Fevqulade ve Vekâletli Elçisi İzabel Dümon, Frenkistan çetel işler Nazirliginde Rusiye ve Şarqiy Avropa meseleleri boyunca Bölükniñ Başlığı Mariye Dümulen, Rusiye ve Şarqiy Avropa meseleleri boyunca Bölükniñ hadimleri Salome Georguyeva ve Lüsyen Tallet ile iş körüşüvini keçirdiler.

Körüşüv esnasında Borıs Babin Temsilcilikniñ kündelik faaliyetini tarif etti, Qırımğa yaqın olğan mesken yerlerde Memuriy hızmet merkezleriniñ açıluvı ve donatıluvı, resmiyleştirüvnen bağlı meseleler ve qırımlılar içün mahsus tasil leyhaları aqqında malümat berdi.

Daimiy Temsilci al-azırdaki qanun yaratıcılıq faaliyeti aqqında ikâye etti ve kelecekte işbirlik imkânlarını muzakere etti. İşğalci devlet tarafından halqara gumanitar, ava ve deñiz uquqınıñ şartlarını bozuv ile bağlı çoqtan-çoq adiseler ve sanktsiyalar siyasetini semereli şekilde yerine ketirüv meseleleri muzakere etildi. Körüşüvniñ neticesi olaraq, taraflar kelecekteki işbirlikniñ tertibi aqqında añlaştılar.