Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdova Gaagada Halqara Ceza Mahkemesi Prokurorına Qırım Muhtar Cumhuriyeti Prokuraturası, İnsan aqları boyunca Ukraina-Helsinki birligi, Baş Prokuror Ofisi adından yollanılğan bildirüvni taqim etken matbuat konferentsiyasında iştirak etti.

Bildirüvde işğalci devlet ve Qırımdaki işğalci akimiyet tarafından jurnalistler ve mustaqil matbuat vastaları muntazam şekilde taqip etilgenine dair isbatlar ketirile.

”Rus işğali esnasında Qırımda insan aqları ve söz serbestliginiñ bozuluvı, jurnalistler ve mustaqil matbuat vastalarınıñ taqip etilmesi ile sıqı şekilde bağlıdır. Asılında, Qırım işğal etilgen soñ, Rusiye Federatsiyası tarafından yapılğan birinci adımlar, yarımadanıñ haber saasını zapt etüv edi, o da ”rus dünyasınıñ” tüşüncelerini darqatmağa ve işğalcilerge qarşılıq köstergenlerni ses aqqından marum etmege yol berdi. Ukrain ve ecnebiy matbuat vastalarınıñ hadimleri ile blogerlerniñ aqları ciddiy şekilide bozuldı ve ne yazıq ki, işğal boyunca yarımadada aynı areketler devam ete”, – dep qayd etti Darya Svırıdova.

”Halqara Ceza Mahkemesine yapılğan bildirüv Qırımda jurnalistlerniñ qanunsız şekilde taqip etilüvine dair Qırım MC prokuraturası tarafından açılğan davalarnıñ malümatlarına esaslana”, – dep bildirdi Qırım Muhtar Cumhuriyeti ve Aqyar şeeri Prokuraturasınıñ reberi İgor Ponoçovnıy.

İşğalci RF akimiyeti tarafından qanunsız taqip etilüvge oğrağan ukrain jurnalisti, (Azatlıq Radiosı – Ukrainadaki Azatlıq Radiosı leyhası) ”Qırım.Aqiqat” matbuat vastasınıñ muhbiri Mıkola Semena qanunsız taqip etilüvge dair öz ikâyesinen paylaştı.

Matbuat konferentsiyası aqqındaki video leyhanı bu yerde seyir etmege mümkün: https://bit.ly/3kAGCIV