Ürmetli qırımlılar!

73 yıl evelsi insanlıqnıñ tarihinde eñ qanlı cenklerden biri bitken edi. Ekinci cian cenkiniñ çoq millionlı qurbanları ve insaniyetke qarşı cinayetleri iç bir vaqıt unutılmaz.

Şunı hatırlamaq kerek ki, işğaller, ilhaqlar, ‘‘tarihiy adaletni tiklemek’’ ve ‘‘umumcian sovet devletini’’ qurmaq ıntıluvlar işbu toymağa bilmez zorbalıqnıñ degirmentaşlarını uyantqan edi.

Bu ölüm arabasını toqtatmaq içün ise adiy insanlar dehşetli fiyat ödedi. Yazıqlar olsun ki, Ekinci cian cenkiniñ dersleri olarnı ilk nevbette ezberleycek adamlar tarafından ögrenilmey qaldı.

Onıñ içün, işğal etilgen Qırımda rusiye istilâcısı tarafından ukrain topraqlarına ketirilgen ‘‘ğalebe quturuvı’’ yarın kene de yüz berecek. Cenk qurbanlarınıñ kemikleri üstünde oyunlar ve qaramanlarnıñ hatırasını aramlağan karnaval qıyafetli aqılsızlar bu temaşanıñ ayırılmaz parçalarına çevirildi.

Ekinci cian cenkiniñ qurbanları ile işğal etilgen Qırımda öz cinayetlerini qapatmaq ıntıluvlar işğalci akimiyetniñ ‘‘ğalebede quturğanlarına’’ fayda bermez. Olar ille de cezalanacaqtır.

Ekinci cian cenkiniñ bütün qaramanlarınıñ ve qurbanlarınıñ ruhları şad olsun!

Natsizmni yeñdik, ruşizmni de yeñermiz!