NATO baş kâtibi Mark Rütte Ukraina Prezidenti Volodımır Zelenskıy ile körüşmek içün Ukrainağa keldi. Körüşüvde taraflar Ukraina ve bütün Avropada telükesizlikni arttıruv meselelerini ve cenkniñ bitmesini yaqınlaştırmaq içün yapılacaq adımlarnı muzakere ettiler. Hususan, telükesizlik kefaletleriniñ azırlanuvı aqqında söz yürsetildi.

Ukraina prezidenti ve NATO baş kâtibi cenkni toqtatmaq içün beraberlikte çalışmalar aqqında fikirlerinen paylaştılar.

«Bu cenkniñ diplomatik çezilüvine razı olmasalar, kerçekten de küçlü sanktsiyalar kerek. Olar cenkni toqtatmağa istemeseler, biz ortaqlarımızdan küçlü paketlerge pek ümüt etemiz. Biz, rusiyeniñ körüşüvden qaçmaması içün elimizden kelgenini yapmaq kerek olğanını tüşünemiz», – dep qayd etti Volodımır Zelenskıy.

Hatırlatamız, Mark Rutte Felemenk baş naziri vazifesinde bulunğanda bile Ukrainağa qoltutqan edi. O, Ukrainağa silâ ve arbiy yedeklerniñ, şu cümleden F-16 qırıcılarınıñ berilmesine qol tuttı ve rusiyeniñ areketlerini sert bir şekilde takbih etti. 2023 senesi fevralniñ 17-nde Kıyivge kelgende, Mark Rutte intervyüde, Felemenk ve Avropa Birligi öz noqta-i nazarında, Qırım Ukrainanıñ parçası olğanını desteklemege devam etecegini qayd etti.

Bundan da ğayrı, Mark Rutte, Berlinde URC 2024 çerçivesinde taqdim etilgen Qırım stendine de diqqat ayırdı.

Halqara ortaqlarımızğa devletimizniñ topraq bütünligine qol tutqanları içün teşekkürler bildiremiz. Çüni Qırım — bu 🇺🇦