2019 senesi kiçik ay (fevral) 13 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov Herson devlet deñiz akademiyasında BMT QİYKİ ile işbirlik neticesinde ”Desâte kvitnâ” cemaat teşkilâtı tarafından teşkil etilgen tedbirde iştirak etti. Tedbir memleket içinde köçken şahıslarnıñ aq-uquqlarını temin etüv ve ihtiyaclarına qıymet kesüv maqsadınen qırımlı studentler içün teşkil etilgen fokus-gruppa şekilinde keçirlidi.

Birinci muavin gençlerni Qırımdan memleket içinde köçken şahıslarnıñ ve vaqtınca işğal etilgen topraqlarda yaşamağa devam etken Ukraina vatandaşlarınıñ aq-uquqlarını ve bu cümleden tasil aqlarını temin etüv boyunca Temsilcilikniñ faaliyeti ile tanıştırdı. Yarımadanıñ vaqtınca işğal etilüvi şaraitlerinde Ukrainanıñ nezareti altında bulunğan topraqlarda tasil aluvnıñ emiyetini qayd eter eken, İzet Gdanov vaqtınca işğal etilgen Qırım MC çalışqan sözde ”oquv yurtları” tarafından berilgen bütün tasil vesiqaları tanılmağanını hatırlattı. Devletimiz Ukrainanıñ nezareti altında bulunğan topraqlarda vaqtınca işğal etilgen Qırım MC yaşağan Ukraina vatandaşları içün ”Qırım-Ukraina” leyhası çerçivesinde qolaylaştırılğan usulnen tasil aluv imkânlarını yarattı.

Ukraina Prezidentiniñ Qırım MC Temsilciligi öz vekâletleri çerçivesinde vaqtınca işğal etilgen topraqlardan mecburen köçken, ya da anda yaşamağa devam etken Ukraina vatandaşlarına qol tutmaqta ve olarğa ertaraflama yardım bermektedir.

Körüşüvniñ soñunda Birinci muavin studentlerge añlı, sebatlı vatandaşlıq mevamları içün minnetdarlığını bildirdi ve ögrenüvde muvafaqiyetler ve güzel yeñişler tiledi. ”Siz, kelecekte devletimizniñ menfaatına Qırımda çalışacaq adamlarsıñız”, – dep qayd etti İzet Gdanov.