2018 senesi arman ayı (august) 22 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki Qırım MC işğalden azat etilüvi ve ğayrıdan integratsıyası hızmetiniñ reberi vazifesini vaqtınca becergen Bahsış Kerimov ‘‘Kül renkteki zonanıñ insanları’’ serlevalı kitapnıñ Ukraina Milliy hatıra institutı tarafından teşkil etilgen taqdim etüvinde iştirak ettiler.

Tedbirde kitapnıñ müellifdeşleri Anna Andriyevska ve Olena Halimon, Ukraina Ortodoks Kilisesi Kıyiv Patrikhanesiniñ Simferopol ve Qırım boyunca Başpiskoposı Kliment, ‘‘Qırım adası. Dejavü’’ filmniñ müellifi İgor Çayka ve Qırımnıñ işğalinden soñ yarımadadan Herson vilâyetine köçken vatandaşlar iştirak etti.

Ukraina Milliy hatıra institutınıñ qol tutuvı ile neşir etilgen kitap, elliden ziyade biografik ikâyeden ibaret olıp, 2014 senesi Qırımda olıp keçken vaqialarnıñ rusiye propagandası tarafından gizlengen, ya da yaramay niyetnen deñiştirilgen kerçek ketişatını aydınlata, işğal ‘‘qansız’’ olğanı ve qırımlılar istilâcınıñ areketlerine qarşılıq köstermegeni aqqında uydurmalarnı red ete.

Taqdim etüvni başlağan Borıs Babin Qırımnıñ işğali başında istilâcığa qarşılık kösterüvde şahsiy tecribesinen paylaştı, Rusiye medeniy dünyağa qarşı alıp barğan informatsıon tecavüzi şaraitlerinde tarihiy kerçekniñ emiyetini qayd etti. Taqdim etüvniñ çerçivesinde Qırımnı ilhaq etüv teşebbüsiniñ sebeplerini ve neticelerini talil etken, 2014 senesi Qırımda olıp keçken vaqialarnıñ şaatları olğan jurnalistler ile sübetlerni içergen ‘‘Qırım adası. Dejavü’’ filmi de numayış etildi.