2018 senesi fevral 9 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin, vaqtınca işğâl etilgen topraqlardan köçken vatandaşlarnen çalışqan hızmetniñ ve reintegratsiya ve işgalden azat etüv boyunca hızmetniñ hadimleri ile beraberlikte Herson şeer şurasnıñ, Herson şeeri kommunal müessiselerniñ ve Milliy politsiya organlarınıñ vekilleri ile muşavere keçirdi. Qırımdan mecburen devlet içinde köçken şahıslarnıñ muracaatları ve şeerniñ kommunal mülküsi olğan yataqhanelerniñ yoqlavı esasında keçirilgen toplaşuvnıñ devamında Qırımdan mecburen devlet içinde köçken şahıslarnıñ mesken aqlarına Herson şeerinde riayet etüv muzakere etildi.

Şeer şurasınıñ temsilcileri bildirgenlerine köre, Qırımdan kelip meskenge muhtac olğan şahıslarnıñ sayısı ep artmaqta, yataqhanelerde ise olarğa kelişken yer qalmadı. Bu cümleden, Qırımdan yañı kelip, mütenasip muracaatta bulunğan daa sekiz qoranta aqqında haber etildi. Boris Babin, sözde ‘’prezident saylavlarından’’ soñ RF-nıñ işğalci akimiyeti Qırım ealisine qarşı cezalavlarnı arttıracağı, bunıñ neticesi olaraq, Herson vilâyetine kelip, meskenge muntac olğan şahıslarnıñ miqdarı da arttacağı aqqında tenbieyeledi. Qırımdan memleket içinde köçken ve Temsilcilikke muracaat etken çoqbalalı qorantanğa şeer şurası mesken meselesini çezmege yardım etkeni ayrıca qayd etildi.

Berilgen meskende asılında yaşamağan, ya da cemaat nizamını ve yaşama şartlarını qaba ve muntazam şekilde bozğan memleket içinde köçken şahıslarnı kommunal meskenlerden marum etüv usulları muzakere etildi. Memleket içinde mecburen köçken şahıslar içün kommunal yataqhanelerniñ tamir etilüvine tehnikiy yardımnı celp etüv imkânları ve Herson şeerinde mevcüt olıp, Qırımdan köçip kelgen vatandaşlarnıñ yerleşüvi içün kelişken başqa obyektlerniñ qıdıruv yolları da muzakere etildi.