2018 senesi ilk yaz ayı (iyün) 14 künü Herson şeerinde keçirilgen ekspert şurasında insan aqlları saasında vaziyet ve Qırımda çalışqan uquq qorçalayıcılar ögünde turğan meseleler muzakere etildi. Körüşüvni Ukraina Prezidentiniñ Qırım Muhtar Cumhuriyetindeki Temsilciligi ve AHIT Demokratik institutlar ve insan aqları boyunca bürosı (DİİAB) beraberlikte teşkil ettiler.

Tedbirde Qırımda insan aq-uquqlarınıñ qorçalavı ile oğraşqan esas cemaat teşkilâtlarınıñ, halqara teşkilâtlarnıñ ve Ukraina Prezidentiniñ Temsilciliginiñ vekilleri, cemi olaraq 28 kişi iştirak etti.

İştirakçiler 2015 senesi AHIT DİİAB ve Milliy azınlıqlar meseleleri boyunca AHIT Yuqarı Komissarı (MAYK) tarafından azırlanğan ‘‘İnsan aq-uquqlarına riayet etüvniñ vaziyeti’’ mevzusında esabatnıñ tevsiyeleri çerçivesinde insan aqlarını qorçalav saasında şimdiki vaziyetni talil etti.

2015 senesi DİİAB ve MAYK tarafından azırlanğan esabatta insan aqlarına riayet etüvnen bağlı olğan bir sıra meseleler aydınlatıldı ve olarğa mütenasip tevsiyeler berildi. ‘‘Bu tevsiyelerni beraber közden keçirip, olarnıñ yerine ketirilüvini talil etmelimiz’’, – dep qayd etti İnsan aqları boyunca DİİAB bölüginiñ müdir muavini Cenifer Kroft. ‘‘Bu tedbir çerçivesinde DİİAB-nıñ maqsadı – mütenasip meselelerge birleşken ve uyğunlaştırılğan qarşılıq kösterüv oğrunda ukrain cemaat teşkilâtlarınıñ akimiyet ile munasebetlerine qol tutuvdır’’.

‘‘Ukrainada uquq qorçalayıcı teşkilâtlar, közetici missiyalar ve akimiyet organları arasında işbirlik Qırımnıñ sakinleri, milliy azınlıqları, temel halqları ve başqa zayıf tabaqalar öğünde turğan putraqlı meselelerge eñ esas, acele ve semereli cevaptır’’, – dep qayd etti Qırımtatar resurs merkeziniñ müdiri Eskender Bariyev.