Ukraina Prezidentiniñ Qırım MC-deki Daimiy Temsilcisi Anton Korınevıç Temsicilikniñ Herson şeerindeki ofisinde Büyük Britaniya Elçiliginiñ eyeti ile körüşüv keçirdi ve işbu eyetnen beraber Herson vilâyeti ve Qırım Muhtar Cumhuriyeti arasındaki memuriy sıñırnı ve ”Çonğar”, ”Qalançaq” ve ”Çaplınka” kiriş-çıqış nezaret etüv noqtalarını ziyaret etti.
Körüşüv esnasında Ukraina Prezidentiniñ Qırım MC-deki Daimiy Temsilcisi Anton Korınevıç ve Büyük Britaniya Qırallığı Arbiy-deñiz quvetleriniñ komodorı, mudafaa meseleleri boyunca Attaşe Tim Vudz ile regiondaki içtimaiy-siyasiy ve havfsızlıq meselelerini, ”Qırım platfromasınıñ” teşkil etilmesini muzakere ettiler.
”Büyük Britaniya Qırallığı Arbiy-deñiz quvetleriniñ komodorı, mudafaa meseleleri boyunca Attaşe Tim Vudz başlığında Ukrainada Büyük Britaniya Elçiliginiñ vekillerinden ibaret olğan eyet vaqtınca işğal etilgen Qırım yarımadası ile memuriy sıñırdaki nezaret etüv noqtalarınıñ üçüni de ziyaret etti. Büyük Britaniyadan kelgen ortaqlarımız kerçek vaziyetni öz közlerinen körmeleri ve bu yerde şahsen bulunıp, Ukrainağa qol tutuvnı bildirilmeleri pek müim olğanını qayd ettiler. Halqara muzakere etüv meydançığı olğan ”Qırım platformasınıñ” teşkil etilmesi de pek müim olğanı qayd etildi. Ukraina Prezidentiniñ Qırım MC-deki Temsilciligi Rusiye Federatsiyasınıñ silâlı tecavüzine qarşılıq köstermege yardım etken ve Ukrainağa ertaraflama qol tutuv bermege azır olğan ortaqlarına öz minnetdarlığını bildire”, – dep izaatladı ziyaretni Ukraina Prezidentiniñ Qırım MC-deki Daimiy Temsilcisi Anton Korınevıç.
Hatırlatamız ki, 2020 senesi boş aynıñ 5-de Ukraina Prezidentiniñ Qırım MC-deki Daimiy Temsilcisi Anton Korınevıçnıñ daveti ile Herson vilâyetini Büyük Britaniyanıñ Ukrainada Fevqulâde ve Tolu Vekâletli Elçisi Melinda Simmons ziyaret etti. Temsilcilikniñ Herson şeerinde ofisindeki körüşüvden ğayrı, Elçi hanım ”Qalançaq” ve ”Çaplınka” kiriş-çıqış nezaret etüv noqtalarını ziyaret etti ve memleket içinde avuşıp, Herson vilâyetinde yaşağan şahıslar, tamır qırımtatar halqınıñ, devlet akimiyeti organlarınıñ ve Hersonda Qırım mevzusı ile oğraşqan cemaat teşkilâtlarınıñ vekilleri ile körüşti.
Ziyaretni teşkil etmege yardım etken Devlet sıñır hızmetiniñ Herson sıñır bölügine minnetdarlığımıznı bildiremiz.