İlk yaz ayınıñ 30-da Ukraina Prezidenti ofisinde Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve onıñ muavinleri Darya Svırıdova ve Tamila Taşeva Qırım MC ve Aqyar şeerini işğalden azat etüv, vaqtınca işğal etilgen Ukraina topraqlarında yaşağan Ukraina vatandaşlarınıñ aq-uquqlarını qorçalavğa dair Ukraina Prezidentiniñ Qırım Muhtar Cumhuriyetindeki Temsilciligi eki yıl devamında alıp barğan faaliyetniñ neticelerine bağışlanğan brifingni keçirdiler.
Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç brifingde bulunğanlarnı Temsilcilikniñ faaliyetinen tanıştırdı, şu cümleden, Ukraina Prezidenti tarafından qoyulğan vazifelerden biri, vaqtınca işğal etilgen Qırım Muhtar Cumhuriyeti ve Aqyar şeeri topraqlarında yaşağan vatandaşlarımıznı ğayrıdan integratsiya etüv olğanını qayd etti.
”Qırımnıñ Ukrainağa ait olğanını hatırlatqanımız pek müimdir. İşğal munasebetinen biz işğalci devlet içün degil de, bizim içün, Ukraina içün müim olğan vaqialarnı da hatırlatamız. Onıñ içün biz Qırım Muhtar Cumhuriyeti ve Aqyar şeeri topraqlarınıñ işğal etilüvine qarşılıq kösterüvni hatırlatamız, bu qarşılıq kösterüv 2014 senesi başlanğan edi, ale daa devam ete ve ukrain bayrağı bizim ukrain Qırımımızğa qaytqance devam etecektir”, – dep qayd etti Anton Korınevıç.
Ukraina Prezidentiniñ Qırım MC-deki Daimiy Temsilcisiniñ birinci muavini Darya Svırıdova vaqınca işğal etilgen Qırım Muhtar Cumhuriyeti ve Aqyar şeeri topraqlarında kütleviy şekilde vatandandaşlarımıznıñ mülkiyet aqları bozulğanını, işağlden evel vatandaşlarımız qullanğan ya da saip olğan topraq damartıları işğalci devletniñ prezidenti tarafından imzalanğan fermanğa binaen çekilip alınğanını qayd etti.
”Fursattan faydalanıp, vaqtınca işğal etilgen topraqlarda yaşağan vatandaşlarımızğa muracaat etmek ve topraqlarını bu sebepten ğayıp etken ya da ğayıp etebilecek vatandaşlarımız aqlarınıñ qorçalanması içün doğrudan-doğru Temsilcilikke muracaat ete bilgenlerini hatırlatmaq isteymiz. Bundan ğayrı, vaqtınca Kıyiv şeerinde çalışıp, vatandaşlarımızğa yardım etken ve ceza mahkemesi prokurorı Ofisine bu cenk cinayetlerini taqdim etken Qırım Muhtar Cumhuriyeti ve Aqyar şeeri Prokuraturasına da muracaat ete bileler, bu cinayetlerni işlegen Rusiye Federatsiyasınıñ vekâletli şahısları ertemi-keçmi ille de mesüliyetke çekilecektir”, – dep qayd etti Darya Svırıdova.
Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Tamila Taşeva vaqtınca işğal etilgen Qırım Muhtar Cumhuriyeti ve Aqyar şeeri topraqlarından kelip çıqqan abituriyentler içün kiriş kampaniyası ve ”Qırım-Ukraina” tasil merkezleriniñ faaliyeti aqqında ikâye etti.
”Qırım-Ukraina” tasil merkezleri vastasınen devletimizniñ bütün topraqlarında vaqtınca işğal etilgen topraqlardan kelip çıqqan abituriyentler içün maksimal şekilde qolaylaştırılğan tertip üküm sürgeni aqqında aytmaq kerekmiz. Şunı da qayd etmek kerekmiz, vaqtınca işğal etilgen topraqlardan kelgen balalar kvotalar çerçivesinde özara yarışmaqtalar. Yani olar, misal olaraq, Lvovda yaşap, Lvovdaki aliy oquv yurtlarına kirecek balalarnıñ raqipleri degil ve başqa şeerlerde de vaziyet aynıdır. Bundan ğayrı, kiriş vaqtında balalar doğuv aqqında şeadetnamelerini taqdim ete bile, oquv yurtuna kirgen soñ ise, üç ay içinde ukrain pasportını taqdim etmeliler”, – dep qayd etti Tamila Taşeva.
Temsilcilik eki yıllıq faaliyetindeki esas ğalebelerinen paylaştı, olarnı aşağıda yerleştirilgen infografikada köre bilesiñiz, tafsilâtlı malümat ise Temsilcilikniñ İnternetteki resmiy saifesinde derc etilecek, bu aqta qoşma bildirüv yapılacaqtır.