Sentyabr 20 künü Geniçesk rayon devlet memuriyetiniñ binasında Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babinniñ reberliginde vaqtınca işğal olunğan Qırım Muhtar Cumhuriyetiniñ actual meseleleri boyunca iş gruppasınıñ birinci tışqı toplaşuvı olıp keçti.

İş gruppasınıñ toplaşuvında Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov, Geniçesk rayon memuriyetiniñ reberiyeti, memuriyet terkibindeki bölüklerniñ reisleri, Geniçesk rayonında bir qaç koy şurasınıñ yolbaşçıları, uquq qorçalav organlarınıñ ve havfsızlıq sektorınıñ temsilcileri, icra akimiyeti territorial organlarınıñ ve öz-özüni idare etüv organlarnıñ vekilleri, Herson vilâyetinde regional Meclis azaları ve başqa selâhiyetli ve meraqlanğan şahıslar iştirak etti.

İş gruppasınıñ toplaşuvı devamında Qırım mevzusı ile bağlı bir sıra mesele baqıldı, olarnıñ çezilüv yolları, vaqtınca işğal etilgen Ukraina topraqlarınen qomşu olğan rayonlarda milliy havfsızlıqnı qaviyleştirecek tedbirler ve Herson vilâyetiniñ cenübiy rayonlarına kelgen Qırım sakinleriniñ aq-uquqlarını ve serbestliklerni temin etilüvi muzakere etildi.

Bu cümleden, ”Çonğar” kiriş-çıqış nezaret noqtasında vaziyet aqqında söz yürsetildi, bu obyektte vaqtınca infrastrukturanıñ, vaqtınca işğal etilgen topraqlarnıñ sakinleri içün mütenasip hızmet yerleriniñ ve naqliyat alâqasınıñ teşkil etilüvi muzakere etildi.

Bundan da ğayrı, toplaşuv iştirakçileri Herson vilâyetindeki Ukraina devlet migratsiya hızmetiniñ Geniçesk rayon sektorınıñ faaliyetini tafsilâtlı şekilde talil ettip, vaqtınca işğal etilgen topraqlarda yaşağan vatandaşlarğa, Qırım sakinlerine, memuriy hızmetlerniñ berilüvinde keyfiyetni kötermege ve menfiy muamelelerden qaçınmağa kerek olğanını qayd ettiler.

Ayrıca iş gruppanıñ iştirakçileri qanunsız taşımalar meselesini baqtılar ve naqliyat saasında yüz berip, memuriy ve kriminal cezalavğa lâyıq olğan davalı vaqialarğa diqqat ayırdılar.

Bundan da ğayrı, oturış devamında, asılında vaqtınca işğal etilgen Qırım Muhtar Cumhuriyetiniñ topraqlarında bulunıp ve Qırımnıñ işğalci akimiyetine qol tutqıp, qıta Ukrainada maaliyesini vekilleri vastasınen nezaret etken şahıslarnıñ ticariy faaliyetleri muzakere etildi. Bu munasebet ile toplaşuvda iştirak etken Geniçesk rayonındaki Çonğar koy şurasınıñ yolbaşçısı Galina Koval Ukraina Havfsızlıq Hızmetiniñ Qırım MC boyunca Baş idaresine Çonğar territorial cemiyetiniñ sıñırlarında ameldeki qanuniyetniñ bozuluvı aqqında alem-aşkâre arizasını teslim etti.

Ukraina Prezidentiniñ Qırım Muhtar Cumhuriyetindeki Temsilcilikniñ reberiyeti Ukraina memurlarınıñ Qırımnı ziyaret etmeleri cinayet sayılğanını qayd etti. By cümleden, Geniçesk rayonındaki Strilkove koy şurasınıñ yolbaşçısı Oleksandr Ponomaryovğa vaqtınca işğal etilgen Ukraina topraqlarına kerçekleştirgen seferleri sebebinden şahsiy ihtar çıqarıldı.

Bundan da ğayrı, iş gruppasınıñ iştirakçileri yerli matbuat vastalarında devlet menfaatına qarşı olğan maqalelerniñ derc etilmesini teñqid ettiler. Öz nevbette icra akimiyetniñ vekillerine ilerinde böyle adiselerniñ ögüni almaq kerek olğanını hatırlattılar. Vaziyet Ukraina Prezidentiniñ Qırım Muhtar Cumhuriyetindeki Temsilciliginiñ daimiy nezareti altında bulunacaq.

Vaqtınca işğal etilgen Qırım Muhtar Cumhuriyetiniñ aktual meseleleriniñ çezilüvi boyunca  iş gruppasınıñ birinci oturışı neticesinde mütenasip qararlar alınıp, muzakere etilgen meselerni çezmek maqsadınen kerekli avaleler berildi.