İşğal etilgen Qırım yarımadasında ve qırımtatar halqına qarşı yapılğan cinayetler içün Rusiye mesuliyetke çekilmeli, – dep ayttı jurnalistlerge Avropa Şurası Prezidenti Donald Tusknen olıp keçken körüşüvden soñ Ukraina Prezidenti Petro Poroşenko.

«Buña iç te qatlanmamız. Rusiye bütün bu vahşiy areketler içün mesuliyetke çekilmeli», – dep qayd etti Ukraina devletiniñ yolbaşçısı.

Petro Poroşenko aytqanına köre, o Donald Tuskka Qırımda olıp keçken vaqialarnı – qırımtatar faalcilerniñ evlerinde tintüvlerni ve olarnıñ azatlıqtan marum etilmesini tarif etti.

Bundan da ğayrı, bu vaqialarnıñ devamında şanlı qırımtatar faalci, qırımtatar milliy areketniñ veteranı 82-yaşlı Veciye Kaşka elâk olğanını bildirdi.

‘‘Qırımda bügün olıp keçken deşetli vaqiyalar aqqında ikâye ettim. Tüntüv, basqı ve qırımtatar faalcilerniñ azatlıqtan marum etilüvi esnasında qırımtatar halqnıñ menfaatını qorçalavında büyük rol oynağan belli faalci vefat etti’’, – dep ayttı Prezident.

Devlet yolbaşçısınıñ fikirince, qırımtatar vatanperverlerni işğalcilerniñ qıyınlavlarından azat etme ve qorçalamanıñ yekâne çaresi – Qırımnı Ukraina terkibine qaytarıluvıdır. ‘‘Bunı qayd etmege isteyim ki, qırımtatar halqını yekâne qorçalav şekili – Qırımnıñ işğalden azat etilüvidir’’, – dep qayd etti Petro Poroşenko.