Noyabr 8 künü vaqtınca işğal olunğan Qırımda ”Qırım birdemligi’’ cemaat teşkilâtı faalcileriniñ evlerinde nevbetteki qanunsız tintüvler keçirildi. Şimdiki vaqıtta 4 region – Bağçasaray, Eski Qırım, İslâm-Terek qasabası ve Aqmescit rayonınıñ Şumhay (Zariçne) köyünde keçirilgen tintüvler aqqında haber etildi. Bunı ”Qırım birdemligi’’ öz Facebook saifesinde bildirdi.

Bağçasarayda keçirilgen qanunsız tintüv neticesinde cemaat faalcisi Seytumer Seytumerov yaqalandı. Eski Qırımda Ruslan Belâlovnıñ evinde tintüv keçirildi. O, bundan evel faal cemaat areketleri içün ”memuriy mesüliyetke” çekilgen edi. Tintüvden soñ Ruslan Belâlovnıñ evinden paraları yoq olğanı añlaşıldı. Belâlovda çalışqan 5 kişini (Asan Rasim oğlu Zekeryayev, Alim Ayder oğlu Zekeryayev, Resul Farik oğlu Abduramanov, Mustafa Ramazan oğlu İsayev ve Amet Halil oğlu Umerov) rayon politsiya bölügine alıp kettiler. Olardan biometrik malümatlarnı almağa tırıştılar. Daa bir tintüv Şumhay köyünde Eldar Kantemirovnıñ evinde keçirildi. Belyalov ve Kantemirovnıñ noutbuk ve telefonlarını qanunsız şekilde tutıp aldılar.

İslâm-Terek qasabasında “silâlılar” İslâm-Terek regional meclis reisi Ekrem Abdulvatovnıñ evinde de nevbetteki tintüv keçirdiler.