Avropa Şurası 2018 senesi oraq (iyül) ayı 30 künü qabul etken 2018/1072 qarar ile Qırım köpüriniñ qurucılığında iştirak etken (‘‘Mostotrest’’ halq öğündeki aktsioner cemiyeti, ‘‘İnstitut Giprostroymost – Sankt-Peterburg’’ aktsioner cemiyeti, ‘‘Zaliv’’ gemi qurucı zavodı, ‘‘Stroygazmontaj’’ sıñırlı mesüliyetli cemiyet, ‘‘Stroygazmontaj-most’’ sıñırlı mesüliyetli cemiyet ve ‘‘VAD’’ aktsioner cemiyeti) şirketlerge qarşı sanktsıyalar kirsetildi. Qararda qayd etilgeni kibi, Keriç köpüri Ukrainanıñ topraq bütünligine, egemeligine ve mustaqilligine qast etken nevbetteki tedbirdir. Köpürniñ quruluvı ve 2018 senesi qural ay (mayıs) 15 künü olıp keçken ‘‘resmiy açılışı’’ Aropa Şurasınıñ 2018/1072 qararı ile qanunsız şekilde zapt etilgen yarımada üstünde rusiye nezaretiniñ quvetleşüvini ve Qırımnı Ukrainadan çetleştirüvniñ devam etmesini ‘‘temsil etken esas adımdır’’.

Ukraina Prezidenti Petro Poroşenko Avropa Şurasınıñ 2018/1072 qararını alğışladı ve ‘‘Keriç sanktsıyalar cedveli Ukrainanıñ Azaq deñizindeki deñiz limanlarını ablukağa alğan Kremlniñ basqıncı areketlerine beraberlikte qarşılıq kösterüvniñ yañı saifesini açqanını qayd etti. ‘‘Halqara ortaqlarımıznen beraber Rusiyeniñ deñiz ablukasını toqtatacaq semereli vastalarnı taparmız’’, – dep qayd etti Ukraina Prezidenti. Petro Poroşenko Ukraina Çetel İşler Nazirligine rusiye tecavuzcısına ve Ukrainalı Qırımnıñ vaqtınca işğali ve onı ilhaq etmek ıntıluvlar ile bağlı olğan birde-bir fizikiy ya da adliy şahıslarğa qarşı sanktsıyalarnı sertleştirüv üstünde işni devam etmege avale etti.