2020 senesi çiçek (aprel) ayı 8 künü sözde Qırım «taqiqat komiteti» haber etkenine köre, qırımtatar halqınıñ lideri Mustafa Cemilevge qarşı ta 2014 senesiniñ yazında açılğan «cinaiy iş» boyunca çiçek ayı 10 künü qabaatlav ilân etilecek.

Mustafa Cemilevni sözde «Rusiye Federatsiyasınıñ sıñırından» qanunsız alda keçkeninde, «qanunsız alda, diqqatsızlıqnen silâ saqlağanında» qabaatlaylar.

Sözde Aqmescit «mahkemesi» ta 2016 senesi «taqiqattan ve mahkemeden saqlanğanı, şaatlarğa tesir ete ya da delillerni yoq ete bilgeni, başqa devletniñ vatandaşı olğanı, Qırımda daimiy yaşağan yeri olmağanı» sebebinden  Mustafa Cemilev içün tevqif etilüv şekilinde ihtiyat tedbirini saylap aldı.

Halqara gumanitar uquqnı bozğan işğalciler işğal etilgen Qırımda öz cinaiy qanuniyetini işletmege, propaganda olaraq Ukraina memurlarını siyasiy sebeplerden ğıyabiy şekilde taqip etmege devam eteler.

Qırım Muhtar Cumhuriyeti ve Aqyar şeeri Ukraina topraqlarınıñ ayırılmaz parçaları olğanını qayd etemiz. Sözde «uquq qorçalav organları» tarafından Mustafa Cemilevge qarşı siyasiy sebeplerden «cinaiy işniñ» açılması Rusiye istilâsına qarşılıq köstergen ve Ukrainanıñ topraq bütünligi içün küreşken qırımtatar halqınıñ liderini qanunsız şekilde taqip etüvden başqa iç bir şey degildir. Bundan ğayrı, böyle areketler işğalciler muntazam şekilde Qırımtatar Milliy Meclisniñ itibarını tüşürmege tırışqanını ve onıñ faaliyetine keder etkenini isbatlay.

Eminmiz ki, bu adisege tek milliy cinaiy işler seviyesinde degil de, halqara seviyedeki mahkemeler tarafından da lâyıq qıymet kesilir.

Fotoresim: Tamila Taşeva