Yanvar 23 künü işğal olunğan Qırımda sözde ”silâlılar” eki qırımtatar – Muhsin Cambaz ve İsmail Ramazanovnıñ evlerinde qanunsız tintüvler keçirdiler. ”Qırım birdemligi” cemaat teşkilâtınıñ faalcileri haber etkenlerine köre, İsmail Ramazanov yaşağan Novıy Міr köyündeki evinden telefon, planşet, ukrain vesiqalar çekip alındı ve 20-den ziyade patron ‘‘tapılğan’’ eken. İsmail Ramazanovnıñ ellerine qaba şekilde deral kelepçe taqıp, ekstremizm teşviqatında qabaatlağanlar. Sözde ‘‘Taqiqat komitetine’’ alıp ketken arada, Ramazanovnı köteklegenler. Sözde ‘‘Aqmescit rayon mahkemesi’’ oña bir aylıq apis cezasını belgiledi.

Muhsin Cambaznıñ Eski Qırım şeerindeki evinde ve Hafuz (Primorskiy) qasabasındaki dairesinde qanunsız tintüvlerniñ sebepleri belgisiz. Tintüv esnasında evinde pencere camlarını parlağanlar.

Yanvar 25 künü qanunsız tintüvler işğal olunğan Qırımnıñ Cankoy şeerinde ve Seiytler rayonında devam etti, neticede daa eki qırımtatarı tevqif etildi. Cankoy şeeriniñ sakini, qırımtatar faali ve bir kişilik piketniñ iştirakçısı Enver Kroşnı sözde ”politsiya” bölügine alıp kettiler, telefon, planşet ve noutbukını çekip aldılar.

Seyitler Vaqıf (Razlivı)  köyünde yaqalanğan Ebazer İslâmovnı Seyitler (Nijnegorskiy) ‘‘politsiya’’ bölügine ketirdiler. Elde olğan malümatqa köre, İslâmov acele tıbbiy yardımğa muhtac.