Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov Qırım.Aqiqat matbuat vastasına bergen izaatta Ukraina Prezidentiniñ Qırım MC Temsilciligi Ukraina Milliy Havfsızlıq ve Mudafaa Şurasına doğrudan-doğru sanktsion cedveline qoşuv aqqında tekliflerini bere bilecek idarelerniñ cedvelini kenişletmege ve Ukraina vatandaşlarına ve milliy şirketlerge qarşı sanktsiyalarnı qullanuv imkâniyetini belgilemege teklif etkenini bildirdi.

Onıñ aytqanına köre, al-azırda ”Sanktsiyalar aqqında” Ukraina qanunı boyunca Ukraina Milliy Havfsızlıq ve Mudafaa Şurasına Ukraina Prezidenti, Ukraina Yuqarı Şurası, Ukraina Nazirler Şurası ve Ukraina havfsızlıq Hızmeti muracaat ete bile. Gdanov qayd etkenine köre, Prezident Temsilcilgi işbu cedvelge bütün nazirliklerni ve Ukraina Prezidentiniñ Qırım MC Temsilciligini qoşmağa teklif ete.

Gdanovnıñ fikirince, ”Sanktsiyalar aqqında” qanunğa teklif etilgen ve vekâletleri çerçivesinde taqdim eticilerniñ cedvelini kenişletken deñişmeler ”namzetlerni” sanktsion cedvellerine tezce tapşırmağa yardım eter.

”Meselâ, naqliyat ile bağlı olğan sanktsiyalar – bu ava, deñiz ve avtomobil vastasınen naqliyattır. Olarnı infraterkip Nazirligi taqdim etmeli. Merkeziy icra akimiyetniñ mütenasip organlarınıñ belli bir vekâletleri ve malümatnı teşkermek imkânları bar, olar malümatnıñ kerçekligi içün mesüliyet taşıylar”, – dep qayd etti İzet Gdanov.

”Qara deñizniñ umumiy suvlarında Rusiye Federatsiya qanunsız alda silâ qullanıp, Ukraina Silâlı Quvetleri Arbiy-deñiz Quvetleriniñ deñizcilerini zapt etkenini kördik. Fikirimizce, bu vaziyette Rusiye deñiz limanlarına, Rusiye bayrağı altında yaldağan deñiz gemilerine, em de başqa devletlerdeki rusiye deñiz ve ozen registrlerine qarşı sanktsiyalarnı qullanmaq kerek”, – dep bildirdi Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov.

Ukraina Prezidentiniñ Qırım MC Daimiy Temsilcisiniñ Birinci muavini, ale daa Ukraina ile Rusiyeniñ içki deñizi olaraq sayılğan Azaq deñizi meselesi üzerinde çalışmaq kerek, dep saya. ”Üçünci devletler tarafından vaziyetniñ nezaret etilüvi üçün fizikiy imkâniyetni yaratmaq maqsadınen Azaq deñizine ”halqara deñiz” uquqiy statusını bermek ve halqara nezaret etici missiyalarnıñ Qara ve Azaq deñizlerinde mandatlarını kenişletmek kerekmiz”, – dep qayd etti o.