Halqara Qırım platformasınıñ beşinci sammitiniñ timsali “Dünya” adlı qalqan oldı. Keramik panosı Nyu Yorkta Birleşken Milletler Teşkilâtı Baş Assambleyasınıñ merkezinde keçirilgen sammit salonında numayış etildi.

İşniñ müellifi, qırımtatar çölmekçisi Rustem Skibinniñ fikrine köre, qalqan tek sanat eserleri degil de, mudafaa, kimlikniñ saqlanuvı içün küçlü bir timsaldir. Bu – insan aqlarınıñ, medeniyetniñ ve Ukrayina topraq bütünliginiñ qorçalanmasınıñ vizual timsali. Qırım işğalge qarşılıq kösterüvniñ ilk sıñırı ve küreşniñ ilk yeri ola ve bu qalqan da tam bunı añlata.

Kompozitsiya Ukrayinadan bütün dünyağa vizual bir bildirme: biz yalıñız özümiz içün küreşmeymiz, biz er kes içün qalqanmız. “Dünya” qalqanı, Qırımnıñ azat etilmesi tek ukrayin meselesi degil de, dünya telükesizliginiñ ve adaletniñ bir parçası olğanını hatırlatqanı içün, Baş Assambleyağa mantıqlı ve simvolik bir şekilde yaraşa. Qalqannıñ sureti tek Qırımnıñ arbiy ananelerinden bir köstergiç degil, tecavuznı toqtatmaq içün halqara uquqnıñ mecazı oldı.

Qalqannıñ adı – “Dünya” – teren mananı taşıy. Panno dünya modelini añdıra, onıñ merkezi (umbon) adalet, onıñ etrafında ise, umumiy maqsatqa baqtırılğan halqlar buluna. Qırım platforması BMT aza memleketleriniñ liderlerini topladı, olar Ukrayina topraq bütünligini desteklegenini ve BMT nizamnamesinde yazılğanı kibi barışıq içün küreşmege azır olğanını bildirdiler.

Bundan da ğayrı, sammit iştirakçilerine “Birlik School” qırımtatar mektebi, Ukrayina musulmanları Diniy idaresiniñ “Umma” ve “Novopeçerska mektebi” oquv-maarif kompleksiniñ talebeleri tarafından yaratılğan resimler berildi, olarnıñ ğayesi çetel diplomatlarğa Qırım Ukrainanıñ ayırılmaz bir parçası olğanını bildirmek edi. Bala resimlerinde “Crimea is Ukraine” yazıları, qırımtatar halqınıñ, atta onıñ eñ yaş temsilcileriniñ, Qırımnıñ Rusiye işğaliden azat etilmesi kerekligini numayış ete.

Bu balalarnıñ iç birisi iç bir zaman yarımadanı öz közünen körmegen, amma episi bu ana-babalarınıñ evi olğanını ve demek olarnıñ da evi olğanını bile.