”Çonğar” kiriş-çıqış nezaret noqtasında Milliy politsiyanıñ Zaporojye vilâyetinde iqtisadiyat qorçalavı boyunca idaresi ve Cenübiy regionındaki Zaporojye garnizonı arbiy savcılığı hadimleri ”Herson-Merkeziy” gümrük noqtasınıñ hadimleri tarafından teşkil olunıp, vaqtınca işğal etilgen Ukraina topraqlarına yasaqlanğan mallarnı kirsetmege imkân yaratqan cinaiy shemanı qayd ettiler.

Operativ-taqiqat tedbirleriniñ devamında uquq qorçalayıcılar ”Çonğar” gümrük resmiyleştirüv idaresiniñ ”Herson-Merkeziy” gümrük noqtasınıñ baş devlet teftişçisi qabaatlı olğanını belgilediler. İşbu şahıs işğal olunğan Qırım Muhtar Cumhuriyetine içki ve tütünniñ maniasız kirsetilmesi içün iş adamından 30,5 biñ grivna miqdarında qapar istegen.

Sentyabr 12 künü Milliy politsiyanıñ Zaporojye vilâyetinde iqtisadiyat qorçalavı boyunca idaresiniñ operativ hadimleri ve Cenübiy regionındaki Zaporojye garnizonı arbiy savcılığınıñ taqiqatçıları Dnipropetrovsk vilâyetinde iqtisadiyat qorçalavı boyunca idaresiniñ hadimleriniñ yardımı ile gümrükçini iş yerinde yaqaladılar. O, iş adamından istegen 30,5 biñ grivna miqdarında qanunsız qazançını alğan edi.

Ukraina Cinaiy kodeksiniñ 368 maddesi (Vazifeli şahıs tarafından teklif, vade, ya da qanunsız qazançını aluv) boyunca, cinayetçini 5-ten 10 yılğace apis muddeti, mülkiyet musaderesi ve 3 yılğa qadar belli bir vazifelerniñ ya da faaliyetniñ yasaq etilüvi bekley.