2018 senesi berim ayı (sentâbr) 25 künü Temsilcilikteki uquqiy talil hızmetiniñ baş mesleatçısı Ruslan Seydametov Ukraina Yuqarı Şurasınıñ insan aqları, milliy azınlıqlar ve halqara munasebetler boyunca Komitet tarafından teşkil etilgen ‘‘Davanıñ ve silâlı istilânıñ aqibetlerini yeñüv vastası olaraq keçici devirdeki adalet meselesi’’ mevzusında tögerek masada iştirak etti.

Tögerek masada Komitetniñ Başlığı Grıgoriy Nemırâ, Ukraina haber siyaseti Naziriniñ Birinci muavini Emine Ceppar, Ukraina halq deputatları İrına Suslova ile Nataliya Veselova ve cemaat teşkilâtlarınıñ vekilleri iştirak ettiler.

Tögerek masa devamında Kolumbiya ve İrlandiya misallerinde keçici devirdeki davalarnı çezüv boyunca halqara tecribe muzakere etildi. Aynı vaqıtta keçici devirdeki adaletni işletüvden evel işğalci akimiyet organları ile işbirlik yapqan şahıslar içün mahsus cinaiy ve memuriy mesüliyet qabul etilmeli, Roma Nizamnanesiniñ ve Halqara cinaiy mahkemeniñ maddeleri Ukraina qanuniyetine kirsetilmeli ve vaqtınca işğal etilgen topraqlar boyunca uquq qorçalav organlarnıñ özara işbirligi quvetleştirilmelidir.