AQŞ Devlet departamentiniñ resmiy vekili Hizer Noyert Kerç köprüsiniñ açıluvı munasebeti ile matbuat vastaları içün yapqan resmiy beyanatında Ukrainanıñ ruhseti olmadan Rusiye ile işğal etilgen Qırımnıñ arasında Kerç köprüsiniñ quruluvını AQŞ takbih etkenini bildirdi. Qırım – Ukrainanıñ bir parçasıdır. Rusiye tarafından köpürniñ quruluvı bu devlet muntazam sürette halqara uquqnı körmemezlikke urğanını bir kere daa hatırlattı. Köpür yalıñız Qırımnıñ Rusiye tarafından qanunsız ilhaqını ve işğalini qanunlaştırmaq teşşebüsi degil de, o aynı vaqıtta Azaq deñiziniñ suvlarına yekâne yol olğan Kerç limanından keçken gemilerniñ büyükligini sıñırlap, gemicilikke keder ete.

AQŞ Rusiyeni gemicilikke keder etmemege çağıralar. AQŞ leyhada iştirak etken bir qaç şahısqa ve şirketke qarşı sanktiyalar qabul etti. Bu ve Qırım ile bağlı başqa sanktsiyalar Rusiye Qırımnı Ukrainanıñ nezareti altına qaytarmağance devam etecek. ‘‘Ukrainanıñ mustaqilligi ve territorial bütünligi boyunca fikirimizni bir kere daa tasdıqlaymız ve BMT Baş Assambleyasınıñ 68/262 Rezölütsiyasında beyan etilgen mecburiyetler aqqında hatırlatamız’’, – dep qayd etti Hizert Noyert.

Frenkistannıñ Ukrainadaki Elçihanesiniñ beyanatında Ukrainanı halqara seviyede tañılğan territorial suvlarınıñ qullanuvında sıñırlağan Kerç köprüsiniñ qurucılığı Frenkisan tarafından takbih etilgeni bildirile. Frenkistan Ukrainanıñ mustaqilligine ve halqara seviyede tañılğan sıñırlarında territorial bütünligine qol tutmağa devam etecek. Ukrainanıñ sıñırlarına qast etüv halqara uquqqa ve bu cümleden RF öz boynuna alğan mecburiyetlerge zıt kele. Bu ise halqara tınçlıq ve havfsızlıq içün doğrudan doğru telüke doğura ve halqara tertip içün ciddiy neticelerge ketire bile.