2018 senesi ilk qış (dekabr) ayı 12 künü Avropa Birligi ile assotsiatsiya añlaşmasını Ukraina tarafindan yerine ketirüv boyunca rezölütsiyasında Avropa Parlamenti Rusiyeniñ Azaq deñizini öz ”içki gölüne” ve munhasur arbiy zonasına çevirmek ıntıluvlarınen büyük raatsızlığını bildirdi.
Bundan da ğayrı, Avropa parlamentiniñ deputatları Rusiyeden Keriç boğazında ve Azaq deñizinde gemicilik serbestliginiñ halqara uquq boyunca kefil etilmesini talap eteler.
”Keriç boğazında ve Azaq deñizinde Rusiye gemicilik serbestligini ğayrıdan tiklemese, Avropa parlamenti Avropa Birligini ve onıñ aza devletlerini Azaq deñizinden kelgen rusiye gemileri içün AB limanlarına irişimni qapatmağa çağıra”, – dep qayd etildi rezölütsiyada.
Avropa Parlamenti öz vesiqasında Rusiye Federatsiyası Keriç boğazında boş ay 25 künü Ukrainağa qarşı aselet yapqan tecavüzini qattı şekilde takbih etti ve ukrain gemileri ile cenk esirleri olaraq tanılğan deñizcilerini deral ve iç bir türlü şart qoymadan azat etilüvini talap etmege çağırdı. Avropa deputatları ”ukrain gemilerine qarşı böyle arbiy küçüni qullanğan Rusiye içün iç bir türlü aqlav olmağanını” qayd eteler.
Bundan da ğayrı, RF ukrain arbiylerni azat etmese ve vaziyetni kerginleştirmeğe devam etse, Avropa Parlamenti AB-ni ve onıñ aza devletlerini istilâcığa qarşı sanktsiyalarnı quvetleştirmege çağıra.
Bunınen beraber, Avropa deputatları vaziyetni sakinleştirmek içün bütün diplomatik vastalarnı qullanmağa çağırdılar ve Kıyiv ile Moskova arasında aracılıq teklifini alğışladılar. Bundan da ğayrı, Avropa Parlamenti öz rezölütsiyasında Avropa Hafsızlıq ve İşbirlik Teşkilâtını (AHİT) ve onıñ aza devletlerini AHİT Mahsus nezaret etici missiyasınıñ vekâletlerini Azaq deñizi regionına da kenişletmege çağıra.
Mütenasip rezölütsiya içün 433 vekil rey berdi, 105 deputat ise qarşı çıqtı.