‘‘Kerç köprüsiniñ qanunsız şekilde quruluvı Kreml halqara uquqnı körmemezlikke urğanını bir kere daa isbatlay. Em de onıñ açıluvı qırımtatar halqınıñ stalin rejimi tarafından sürügün etilivüniñ nevbetteki yıldönümi arfesinde yapılmaqta, – dep qayd etti öz Facebook saifesinde Ukraina Prezidenti Petro Poroşenko.

‘‘Moskova Qırımnıñ vaqtınca işğalini qanunlaştırmağa ne qadar tırışsa da, bir sıra halqara mahkeme müessiselerniñ qararları, halqara cinayetleri içün Rüsiyeniñ mesüliyeti kün-künden artacağını tasdıqlay’’, – dep qoştı devletniñ Başlığı.

Onıñ fikirince, Ukraina öz menfaatini muntazam şekilde qorçalamağa devam etecek. ‘‘Şunı hatırlatmaq isteyim ki, menim avalem boyunca Deñiz uquqı konventsiyasınıñ tahkim mahkemesine Ukrainanıñ egemenligini, bu cümleden, Kerç köprüsiniñ qanunsız qurucılığı ile bozulğan menfaatını qorçalamaq maqsadınen ariza taqdim etildi’’, – dep bildirdi Petro Poroşenko.

Prezident qayd etti ki, rusiye akimiyeti öz qurucılıq leyhalarına ayrı avropalı şirketlerni celp etip, böyleleknen halqara-uquqiy mesüliyetten qaçacaq ola. ‘‘Eminim ki, istilâcı bunu yapamaz ve tolu derecede mesüliyetini çekecektir. Köpür ise işğalcilerge Qırımımıznı acele sürette terk etmek içün kerek olur’’, – dep qayd etti Ukraina devletiniñ Başlığı.