2018 senesi fevral 20 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov ve Temsilcilikniñ diger hadimleri Kök Yüzlüginiñ Qaramanları Künü ve facialı vaqia – Qırımnıñ işğali başlamasınıñ yıldönümi munasebetinen olıp keçken tedbirlerde iştirak ettiler.
Çıqışı devamında İzet Gdanov Kök Yüzlüginiñ Qaramanlarınıñ hatırasını añdı ve fevral 20 künü Kiyev şeerinen Qırım yarımadasında bir arada olıp keçken facialı adiselerni hatırlattı.İzet Gdanov Ukrainanıñ vaqtınca işğal etilgen Qırım toprağında Rusiye akimiyeti tarafından ukrain vatanperverlerine, qırımtatar ve ukrain halqlarına qarşı kütleviy repressiyalar, insan aq-uquqlarınıñ ve serbestlikleriniñ bozuluvı, söz ve fikir serbestlikleriniñ sıñırlanuvı aqqında ikâye etti. İşğalciler Qırım ealisini, esasen işğalci ve istilâcılarğa şiddetli qarşılıq köstergen qırımtatarlarnı qorqutmağa tırışqanlarını hatırlattı.
Ukrainada bütün devlet organları halqara cemiyet ile beraberlikte işğal olunğan topraqlarnıñ azat etilmesi içün qollarından kelgenini yapalar.