Sentâbrniñ 24-nde Büyük Britaniya Elçisiniñ Kıyivdeki rezidentsiyasında “Crimea Vox: İşğalniñ hronikası” vesiqalı serialınıñ birinci epizodı numayış etildi. Tedbir Nyu Yorkta BMT Baş Assambleyasınıñ merkezinde ötkerilgen Halqara Qırım platformasınıñ beşinci sammitine bağışlanğan. Tedbir diplomatik missiyalar, halqara teşkilâtlar, ukrayin devlet memurları, qırımtatar falleri, jurnalistler ve ekspertlerniñ vekillerini bir arağa ketirdi. Temsilcilikniñ adından Qırım platformasınıñ faaliyetini temin etüv hızmetiniñ baş mesleatçısı Darya Piskun çıqışta bulundı.

Serial, Qırımnıñ Rusiye tarafından işğaliniñ yıl sayın keçkenini belgilegen, 1990 senelerinden 2022 senesine qadar devam ete. Er bir seriya faktlarğa, arhiv materiallarına, şaat ve zarar körgenlerniñ ifadelerine ve teşkerilgen analitiklerge esaslana. Crimea Vox Media taqımı tarafından amelge keçirilgen leyhanıñ maqsadı – tasil, halqara advokatsiya ve tarihiy aqiqatnıñ qayd etilmesi içün işğal aqqında müim faktlarnı saqlap qaluv.

Ukrayinada Büyük Britaniya işlerinden vekâletlisi Şarlotta Süren musafirlerge hayırlav sözüni ayttı:

“Büyük Britaniya, Qırımnıñ Rusiye tarafından qanunsız işğalinden zarar körgen insanlarnıñ sesini eşittirgen bu küçlü leyhağa qol tutqanından ğurur duymaqta. Olarnıñ şahsiy ikâyeleri ğayıplarnen, acılarnen ve qorqularnen tolu ve bu ikâyeler seslendirilmeli ve eşittirilmeli. Bu yalıñız diplomatik bir mevam degil, bu ahlâq ve insaniyetlik meselesi”.

Kösterüvden soñ panel munaqaşası olıp keçti, oña “Ukrayinska pravda” neşiriniñ baş muarriri Sevgil Musayeva, Crimea Vox tesisçisi ve BMT tamır halqlar meseleleri boyunca daimiy forumınıñ azası Suleyman Mamutov, Qırım platformasınıñ faaliyetini temin etüv hızmetiniñ baş mesleatçısı Darya Piskun qoşuldılar. Munaqaşanı jurnalist Andrey Kulikov alıp bardı.

Qırım platformasınıñ faaliyetini temin etüv hızmetiniñ baş mesleatçısı Darya Piskun, Qırım işğali boş yerden çıqmağanını bildirip, açıq arbiy istilâdan evel Rusiye daimiy sürette teşviqatqa yatırım yapıp, kelecekte istilâ içün zemin yaratqanını qayd etti. Hususan, o, yarımadanıñ Rusiye Federatsiyasına “tarihiy mensüpligi” aqqında tarqalğan ikâyelerniñ maqsadı – Qırımnıñ kerçek tarihını yavaş-yavaş yoq etmek içün “adaletniñ tiklenmesi” illüzsiyasını şekillendirüv olğanını qayd etti.

Darya Piskun şunı da qayd etti ki, Qırım meselesi yalıñız topraq meselesi degil, aynı zamanda insanlarnıñ, hususan tamır halqlarnıñ meselesi ola. Qırım er vaqıt bir çoq medeniyetniñ beşigi edi, anda farqlı etnik gruppalar muabbet yaşay edi, Rusiye işğali şaraitlerinde ise bu çeşitlik telüke altında buluna.

Munaqaşa iştirakçileri işğalniñ insaniy bedelleri, Rusiye teşviqatınıñ telükesi ve Qırımnı dünya kün tertibinde saqlap qaluvnıñ müimligini muzakere ettiler, kerçekni bildirmek, repressiya qurbanlarına qoltutmaq ve Rusiyeni cinayetleri içün mesüliyetke çekmek içün bu kibi leyhalar da pek müim olğanını qayd ettiler.