Mayısnıñ 26-nda Uquqiy temin etüv bölüginiñ reber muavini Anatoliy Çehun V.N. Karazin adına Kharkiv milliy universitetiniñ Ukrayina Prezidentiniñ Qırım Muhtar Cumhuriyetindeki Temsilciligi ile işbirlikte işlep çıqarılğan “İşğal etilmegen topraqlarda idare etüvi” magistratura programmasınıñ studentleri içün lektsiya keçirdi.

Tedbirge Devlet idaresi institutınıñ studentleri ve vaqtınca işğal etilgen topraqlarnıñ işğalden qurtarıluvı ve reintegratsiyası ile meraqlanğan diger iştirakçiler qoşuldı.

Lektsiya vaqtında işğalden azat etüv ve Qırımnıñ reintegratsiyası siyaseti, keçici adliye mehanizmleri, em de Ukrayinanıñ vaqtınca işğal etilgen topraqlar üzerinde nezaretini ğayrıdan tiklegen soñ rastkelgen meseleler muzakere etildi.

Anatoliy Çehun ayrıca, reintegratsiya siyaset saasında Temsilcilikniñ faaliyetine diqqat ayırıp, işğalden soñ yarımadanıñ kelecekteki ğayrıdan tiklenüvi boyunca kompleks baqışnı şekillendirmege tırıştı.

Bu kibi lektsiyalar, Ukrayinanıñ vaqtınca işğal etilgen topraqlarınıñ devlet idaresi ve reintegratsiyası meseleleri üzerinde kelecekte çalışacaq mütehassıslarnıñ azırlanmasınıñ müim bir parçasıdır.