‘‘Kreml aselet adamlarnıñ azaplarını ziyadeleştirgen yolnen kete. İşğal olunğan Qırım, uquq qorçalayıcılarnıñ aytqanlarına köre, cezalavlar territoriyasına çevirildi. Kemlnen razı olmağanlar öz azatlıqlarını ve atta ayatlarını telükege oğrata”, – dep ayttı BMT Baş Assambleyadasındaki çıqışı devamında Prezident Petro Poroşenko.
Prezident qayd etti ki, qırımtatarlar ve ukrainalılar içtimaiy ağlarında yazuvları sebebinden, ya da, 2016 senesi dekabr ayında qırımlı fermer Volodımır Baluhnen olğanı kibi, öz şahsiy evlerinde ukrain milliy bayrağını asqanları içün azatlıqtan marum etile. Faaliyeti işğalci akimiyet tarafından yasaq etilgen Qırımtatar halqınıñ temsilci organı – Milliy Meclis liderlerniñ taqip etilüvi de devam etmekte. Bir afta evelsi Meclis reisiniñ muavini Ahtem Çiygoz rus işğaline qarşı çıqqanı içün 8 yılğa mahküm etildi. Meclis reisiniñ daa bir muavini – ciddiy sağlıq problemleri olğan İlmi Umerov ev apisinde buluna, oña tedaviylev içün bile Qırımnı terk etmege yasaq etildi.
‘‘Rusiye BMT Baş Assambleyasınıñ ”(Ukrainanıñ) Qırım Muhtar Cumhuriyetinde ve Aqyar şeerinde insan aq-uquqları saasındaki vaziyet” 71/205 sanlı rezolütsiyasını namerdane boza’’, – dep ayttı Petro Poroşenko ve qayd etti ki, bu memleket İnsan aq-uquqları boyunca Baş komissar İdaresiniñ Qırımğa halqara nezaret taqımlarınıñ kelmesine şarait yaratuvnen bağlı bütün çağıruvlarını körmemezlikke ura.
Ukraina Prezidenti Kremlniñ BMT Halqara Mahkemesiniñ vaqtınca tenbileyici tedbirlerini yerine ketirmegenine de Baş Asssambleyanıñ diqqatını çekti. O, Halqara Mahkeme Rusiyeden qırmtatar cemiyetiniñ temsilci organlarınıñ, bu cümleden, Milliy Meclisiniñ faaliyetinen bağlı sıñırlamalarnıñ devam etmesinden ya da yañılarnı kirsetmekten vazgeçmeğe ve Ukraina vatandaşlarınıñ ukrain tilinde oqumağa aqlarını temin etmege talap etkenini hatırlattı.
”Halqara cemiyet Rusiyeniñ halqara mecburiyetlerine böyle ürmetsizligine aqlı cevap bermeli’’, – dep qayd etti Petro Poroşenko.
Ukraina Prezidenti halqara cemiyetni, qırımtatar halqına ve ukrainalılarğa qarşı Stalinniñ totalitar ideologiyasınıñ zemaneviy mühlisleri tarafından yañı genotsidniñ ögüni almaq maqsadınen Qırımdaki vaziyetni diqqatlıca közetmege çağırdı.
‘‘Umüt etem ki, siziñ eyetleriñiz vaqtınca işğal olunğan Qırımda insan aq-uqularına riayet etilüvine bağışlanğan Ukrainanıñ teşebbüslerine, bu cümleden BMT Baş Assambleyasınıñ nevbetteki rezolütsiyasına qol tutar. Qırımnıñ işğalden azat etilüvi içün halqara ğayretlerini küçleştirmelimiz, – dep qayd etti Ukraina devletiniñ başlığı.
Prezident beraberlikte yapılacaq adımlar ve areketlerniñ uyğunlaştıruvı içün ukrainalı Qırımnıñ dostlarından halqara gruppa teşkil etmege teklif etti.
”Halqara ortaqlarımıznıñ uyğunlaştırılğan ve maqsatkâr qol tutuvına işanamız’’, – dep neticeledi Ukraina Prezidenti ve halqara cemiyetke Qırımnıñ silâlaştırılmasına yol bermemekni tenbiyeledi. Onıñ fikirince, bu ”Cenübiy ve Şarqiy Avropağa, Şimaliy Afrikağa ve Yaqın Şarqqa tesir etecek daa bir telükedir”.
Prezident hatırlattı ki, BMT Baş Assambleyası kibi eñ üst halqara seviyede de Rusiye işğalci devlet kibi tañıldı. Bu ise, Teşkilâtnıñ doğru yolnen ketkenini tasdıqlay.