BMT Baş Assambleyasınıñ 80-nci toplaşuvı çerçivesinde keçirilecek Qırım platformasınıñ beşinci sammitiniñ arfesinde Ukrayina Prezidenti “Şahsiy mahsus iqtisadiy ve diger sıñırlav tedbirleriniñ (sanktsiyalarnıñ) qullanılması aqqında” Ukraina milliy havfsızlıq ve mudafaa şurasınıñ 2025 senesi sentâbrniñ 20-nde qabul etilgen qararını amelge keçirgen № 695/2025 buyruğını imzaladı.

Sanktsion qarar 66 fizikiy ve 13 uquqiy şahısqa qarşı kirsetildi. Bu cedvelge kirgenler:

• Qırım Muhtar Cumhuriyetiniñ işğalci organlarında sözde “nazirliklerniñ” yolbaşçıları;
• yarımadada insan aqları bozuluvlarında iştirak etken Rusiye Federatsiyasınıñ mahkeme sisteması temsilcileri;
• Rusiye teşviqatınıñ tarqaluvı ile bağlı şahıslar;
• Rusiye ordusına destek ve yardım köstergen teşkilâtlar.

Olar, tecavuzcı devletniñ sisteması tarafından yaratılğan ve idare etilgen qanunsız organlarnıñ işinde doğrudan iştirak eteler. Olarnıñ faaliyeti işğal siyasetiniñ kerçekleştirilmesine, Rusiye qanunlarınıñ qaidelerine, işğalci akimiyet organları tarafından qabul etilgen normativ-uquqiy aktlarnıñ yerine ketirilmesine, Rusiye Federatsiyasınıñ standart ve ameliyatlarınıñ kirsetilmesine ve vaqtınca işğal etilgen topraqlarnıñ Rusiye Federatsiyasınıñ uquq ve memuriy alanına integratsiyasına doğrultılğan. Böyle areketler Ukrainanıñ suvereniteti, havfsızlığı ve topraq bütünligine telüke ketire, cemiyet menfaatlarına zıt kele ve işğalge yol aça.

Sanktsiya cedvelini azırlavda Ukrayina Prezidentiniñ Qırım Muhtar Cumhuriyetindeki Temsilciligi de faal iştirak etti. Ukrayina milliy havfsızlıq ve mudafaa şurasına, Ukraina havfsızlıq hızmetine ve prezidentniñ sanktsiyalar siyaseti meselelerinden vekâletlisine semereli iş içün minnetdarlığımıznı bildiremiz. Bu paket Ukrayina areketleriniñ sistemli ve ardı-sıra olğanını köstere, işğalniñ devam etkenine baqmadan, istilâcılarnen satqınlarğa basqı eksilmeyip, sanktsiyalar siyasetiniñ ileride de inkişaf etecegini köstere.

Ukrayina Prezidentiniñ Qırım Muhtar Cumhuriyetindeki Temsilciligi yarımadadaki vaziyetni muntazam sürette nezaret etmege ve milliy menfaatlarnı qorçalav ile halqara uquqnıñ bozuluvına qarşılıq kösterüv mehanizmi olaraq sanktsiyalarnı qullanmaq içün teklifler azırlamağa devam ete. İşimizniñ esas yönelişlerinden biri, Ukrayina vatandaşlarınıñ aqlarını bozğan işğalci memuriyetlerniñ faaliyetinde iştirak etkenlerge qarşılıq köstermektir.

Sanktsiya basqısını quvetleştirüv halqara uquqnıñ bozuluvına qarşılıq kösterüvniñ müim bir aletidir ve Ukrayina ile onıñ vatandaşlarına qarşı çağıruvlarğa tez cevap bermege imkân bere. Qayd etemiz: Qırım içün küreş bütün meydanlarda devam ete, sanktsiyalar ise – işğalci ve onıñ yardımcılarına qarşılıq kösterüvniñ semereli vastalarından biridir.

Ukrayina Prezidentiniñ Qırım Muhtar Cumhuriyetindeki Temsilciligi halqara ortaqlarnı bu teşebbüske qol tutmağa ve işğalcilerniñ repressiyaları ile qanunsız faaliyetine alâqası olğan şahıslarğa nisbeten aynı sıñırlavlarnı kirsetmege çağıra. Ukrayina ve halqımız içün adaletni ğayrıdan tiklev bizim içün ilk nevbette ve biz bunıñ üzerinde faal çalışmağa devam etemiz. Sanktsiyalar kirsetilecek fizikiy ve uquqiy şahıslarnıñ tolu cedveli Ukraina Prezidentiniñ 695/2025 Fermanında derc etilgen.