2025 senesi avgustnıñ 24-nde 68-inci esir deñişimэ çerçivesinde Qırım siyasiy mabüsi Kostântın Davıdenko Ukrainağa qayttı, dep bildire Facebookta “Kreml siyasiy mabüsleriniñ soy-sopları birleşmesi” cemaat teşkilâtınıñ başı İgor Kotelânets.

Hatırlatamız, Konstântın Davıdenko 2018 senesi işğalciler tarafından Qırımda tutulıp, devlet sırı olğan malümatnı toplamaqta ve onı çetel devletke yetkizüvde qabaatladılar. 2019 senesi iyünniñ 5-nde rusiye savcısı onıñ içün 12 yıl koloniya cezasını istedi, amma 2019 senesi iyünniñ 6-nda Qırım “yuqarı mahkemesi” qanunsız şekilde Konstântınni 10,5 yıl sert rejimli koloniyada apis cezasına mahküm etti.

2019 senesi oktâbrniñ 15-nde “rusiye mahkemesi” ceza müddetini 7 yılğa qadar qısqarttı.

68-inci deñişim çerçivesinde desant-ücümci, ava, arbiy-deñiz quvetleriniñ vekilleri, Territorial mudafaa, Milliy gvardiya, Devlet sıñır hızmeti arbiyleri ve arbiyolmağan vatandaşlar azat etildi.

Temsilcilik, Kremlniñ bütün siyasiy mabüsleriniñ eñ yaqın vaqıtta azat etilmesini ve ğarbiy memleketlerden sert sanktsiyalar kirsetilmesi yolunen işğalci devletke basqı quvetleştirilmesini talap ete.