Rusiye apishanesinde bulunğan qırımtatar siyasiy mabüs Tofik Abdulğaziyev ömür arqadaşına esini coymağa başlağanını bildirdi. Onıñ nefes tutulması da çoqlaşqan. O, bir yıldan ziyade Çelâbinsk şeerindeki 3-nci sanlı apishaneniñ verem hastahanesinde tutulmaqta, amma onıñ alı ket-kete fenalaşmaqta.

“Tofiq apansızdan esini coyacaq olsa, daima töşekniñ yanında olmağa tırışa. Er keske muracaat etem, aqayımnıñ vaziyetine diqqat etiñiz. Men aqayımnıñ azat etilmesini talap etem”, – dedi Tofik Abdulğaziyevniñ apayı.

2023 senesi Tofik Abdulğaziyevni sözde “terrorizm”de qabaatlap, 12 yıl apis cezasına mahküm ettiler. Soñra onıñ miyinde metastazlarnen yaman tabiatlı şişik tapıldı, o, aman-aman tolusınen körme qabiliyetini coydı. Bundan da ğayrı, o, aqciger ve miy verem hastalığınen keçirdi, bayağı azdı.

Advokat ve qoranta siyasiy mabüsniñ sağlığı sebebinden azat etilmesini talap eteler. Çelâbinsk vilâyet mahkemesine koloniyada ileride qalmaq mümkün olmağanını tasdıqlağan tibbiy raportlarnen arizalar berildi, amma işniñ baqıluv künü daa belgilenmedi. 2024 senesi avgust ayında mahkeme endi ağır diagnozlarğa baqmadan, müddetten evel azat etmekni red etti.

2014 senesi rusiye Qırımnı işğal etkeninden berli Ukrayina vatandaşlarınıñ, şu cümleden tamır halqlarnıñ yaşayışı işğalci akimiyet tarafından bir sıra taqip ve zulumğa çevirildi. Qanunsız tutuvlar ve repressiyalar öz aqlarını ya da pozitsiyasını qorçalamağa tırışqanlar içün endi alışıq oldı.