2019 senesi kiçik ay (fevral) 19 künü Herson vilâyeti devlet memuriyetinde vilâyette qırımlılar içün tıbbiy yardımnı teşkil etüv ve Qırım MC-den saylavcılarnıñ bu sene saban (mart) ayında Ukraina Prezidenti saylavlarında iştirak etüvleri içün mütenasip şaraitler yaratuv boyunca muşavere olıp keçti.

Toplaşuvda Ukraina Prezidentiniñ Qırım Muhtar Cumhuriyetindeki Temsilciliginiñ apparat reisi ve uquqiy talil hızmetiniñ reisi iştirak ettiler.

Muşavere esnasında Qırım MC-de yaşağan saylavcılardan saylav adresini deñiştirmeden vaqtınca saylav yerini deñiştirüv aqqında arizalarnı qabul etüv içün mütenasip şaraitlerni yaratuv, vaqtınca işğal etilgen yarımadanıñ sakinlerine iradelerini beyan etüvde ertaraflama uquqiy ve informatsion qol tutuv, qırımlılarğa ilk ve ekinci nevbet tıbbiy yardımnı berüv içün Geniçesk, Qalançaq, Çaplınka mesken yerlerinde sağlıq saqlav müessiselerniñ faaliyetlerini teşkil etüv meseleleri muzakere etildi.

Muşavereniñ neticesi olaraq, vaqtınca işğal etilgen Qırım MC-de yaşağan Ukraina vatandaşlarını yuqarıda qayd etilgen ceryanlarda teşkiliy-metodik ve informatsion ceetten qol tutuvnen temin etmek qararı alındı.