Ziyaret çerçivesinde qara qış ayınıñ 14-de Latviya Cumhuriyetiniñ Ukrainadaki Fevqulâde ve Tolu vekâletli Elçisi Yuris Poykans Herson vilâyeti devlet memuriyetiniñ başlığı vazifesini vaqtınca becergen Sergiy Kozır ile körüşip, Herson vilâyeti ve Qırım Muhtar Cumhuriyeti arasındaki memuriy sıñırında yerleştirilgen ”Qalançaq” ve ”Çaplınka” kiriş-çıqış nezaret etüv noqtalarını ziyaret etti. Elçi işğal etilgen topraqlarda yaşağan Qırım sakinleri memuriy sıñırnı nasıl şaraitlerde keçkenlerini öz közlerinen körip, sıñırcılarnen, hususan Ukraina Devlet sıñır hızmeti Herson sıñır bölüginiñ başlığı Vladıslav Kobılâkov ile qonuşıp oldı.
Ziyaret çerçivesinde memleket içinde avuşıp, Herson vilâyetinde yaşağan şahıslar, tamır qırımtatar halqınıñ, devlet akimiyeti organlarınıñ ve Hersonda Qırım mevzusı ile oğraşqan cemaat teşkilâtlarınıñ vekilleri ile körüşüvniñ bugün keçirilmesi de planlaştırıldı.
Ukraina Prezidentiniñ Qırım MC-deki Temsilciligi Ukrainanıñ topraq bütünligine ve egemenligine izçen surette qol tutqan, Qırımnı işğalden azat etüv oğrunda halqara seviyede küreşken ve vaqtınca işğal şaraitlerinde yaşağan Ukraina vatandaşlarına diqqat ayırğan Ukraina ortaqlarına, şu cümleden Ukrainada Latviya Cumhuriyetiniñ Elçihanesine, Fevqulâde ve Tolu vekâletli Elçisi Yuris Poykansqa samimiy minnetdarlığını bildire.
Ziyaretni teşkil etmege yardım etken Devlet sıñır hızmetiniñ Herson sıñır bölügine minnetdarlığımıznı bildiremiz.