2018 senesi çiçek ayı (aprel) 19 künü Ukraina Prezidentiniñ Qırım MC Daimiy Temsilcisi Borıs Babin, onıñ Birinci muavini İzet Gdanov, Temsilcilikniñ haber-talil hızmetiniñ yolbaşçısı Svitlana Tkaçenko, Qırım MC işgalden azat etilüvi ve ğayrıdan integratsiyası ve vaqtınca işğal etilgen topraqlardan köçken vatandaşlarnen iş boyunca Temsilcilikteki hızmetleriniñ hadimleri Lviv şeerinde iş ziyareti ile bulundılar.
Ziyaret esnasında Temsilcilikniñ reberiyeti Lviv vilâyeti devlet memuriyetiniñ başlığı Oleg Sinütka, onıñ muavini Oksana Stokolos-Voronçuk, Lviv vilâyetinde Devlet migratsiya hızmetiniñ Baş idaresi ve Baş territorial adliye idaresiniñ reberiyeti, em de Lviv şeer başlığı Andriy Sadovıy ile iş körüşüvlerni keçirdiler.
Körüşüvler çerçivesinde Qırımdan memleket içinde regionğa ve vilâyetniñ merkezine köçip kelgen şahıslarnıñ aq-uquqlarınıñ qorçalavı ve ilk nevbette meseleleriniñ çezilüvi, hususan qırımlılarnıñ tasil aqlarına regionnıñ aliy oquv yurtlarında riayet etüv, regionğa kelgen qırımtatarlarnıñ mektepten evel ve mektepte ana tilde tasil aqlarına riayet etüv, köçip kelgen qırımlılarnıñ şeerniñ ve regionnıñ medeniy saasında aks etilüvi muzakere etildi.
İş ziyareti çerçivesinde Lviv vilâyeti devlet memuriyetiniñ qol tutuvı ile Ukrainanıñ vaqtınca işğal etilgen topraqlardan köçip kelgen Ukraina vatandaşlarınıñ, yarımadadan Ukrainanıñ ğarbiy regionlarına mecburen köçken şahıslarnıñ iştimaiy, tasil-medeniy ve mülkiyet aqlarına riayet etüv boyunca ofisten tış iş muşaveresi keçirildi.
Muşaverede Volın, Zakarpattya, İvano-Frankivsk, Lviv, Rivne, Ternopil, Hmelnitsk ve Çernivtsi vilâyetleriniñ devlet memuriyetleriniñ yolbaşçıları ve mütenasip bölükleriniñ hadimleri iştirak etti. Muşavere esnasında Qırımdan Ukrainanıñ ğarbiy regionlarına köçip kelgen vatandaşlarınıñ eñ aktual meseleleri, bu cümleden, vaqtınca meskenniñ berilüvi, 2018 senesi kiriş kampaniyası çerçivesinde tasil hızmetlerge irişim, keyfiyetli tıbbiy yardımğa irişim, işke yerleşüvde yardım, iştimaiy hızmetlerniñ alıcılarınıñ verifikatsiyası muzakere etildi.
Borıs Babin vilâyetlerde qırımlılarnıñ mesken problemalarını çezmek, devlet ve yerli bücetlerden sermiya ve halqara donorlarnıñ tehnikiy yardımnı almaq içün semereli mehanizmlerni işletmege kerek olğanına muşaverede bulunğanlarnıñ diqqatını çekti. Daimiy Temsilci, 2018 senesi aliy oquv yurtlarına kiriş boyunca qırımlılar içün reklam-haber kampaniyasını mükemmelleştirmek kerek olğanını kene de qayd etti.
Keñeşniñ neticesi olaraq, Qırımdan memleket içinde köçken şahıslarnıñ içtimaiy, tasil-medeniy ve mülkiyet aqlarına riayet etüvni vilâyetlerniñ ealisinen teñ seviyede regional programmalar çerçivesinde temin etmek oğrunda çalışmaq, Temsilciliknen beraber qırımlılarnıñ yerli cemiyetlerge alışuv ve integratsiyaları esnasında peyda olğan meselelerni çezmek, memleket içinde köçken şahıslar ve vaqtınca işğal etilgen topraqlarda yaşağan vatandaşlar arasında regionlarnıñ oquv yurtlarında aliy ve orta tasilniñ aluv imkânları aqqında malümatnı darqatmaq, memleket içinde köçken şahıslarnıñ meseleleri boyunca mütenasip regional programmalarına maliyeniñ berilüvini ve olarnıñ yerine ketirilüvini teşkermek, Ukraina devlet bücetinden memleket içinde köçken şahıslarğa yüksek keyfiyetli tıbbiy yardım içün subventsiyalar ayıruv meselesi üstünde çalışmaq, regionlarda memleket içinde köçken şahıslarnıñ tıbbiy, mesken, medeniy, tasil ve içtimaiy ihtiyaçlarını yerine ketirüv boyunca aylıq ve üç ayda bir malümatnıñ berilüvni Temsilciliknen uyğunlaştırmaq kibi qararlar qabul etildi.
Ziyaret esnasında Lvivde Qırımtatar medeniy merkeziniñ temsilcileriniñ, viliayet devlet memuriyetinde içtimayi qorçalav Departamentiniñ, yerli meşğullik merkeziniñ, Ukraina pension fondunıñ Baş regional idaresiniñ, memleket içinde köçken şahıslarnıñ meseleleri boyunca Nazir mesleatçısınıñ, ‘‘Kelişken mesken’’ devlet programmasınıñ regional vekilleriniñ yardımları ve qol tutuvı ile Temsilcilikniñ reberiyeti şahsen vatandaşlarnı qabul etti.