Bugün, oraq ayınıñ 22-de, Ukraina Prezidenti Volodımır Zelenskıy Ukraina Yuqarı Şurası tarafından 2021 senesi ilk yaz ayınıñ 29-da qabul etilgen ve vaqtınca işğal etilgen Ukraina topraqlarına kiriş-çıqış tertibini bozğan şahıslarğa nisbeten memuriy cezalavlarnı vaqtınca lâğu etken ”«Maqsadı Ukraina topraqlarında (COVİD-19) koronavirus hastalığınıñ peyda olıp darqaluvına qarşılıq kösterüv olğan Ukraina qanuniy senetlerine deñişmeler kirsetüv aqqında» 530-IX sanlı Ukraina Qanunınıñ “Yekünleyici maddeler” adlı II bölügine deñişmeler kirsetüv aqqqında” 1583-ІХ sanlı Ukraina Qanunı imzaladı.

Qanunğa binaen, vaqtınca işğal etilgen Ukraina topraqlarında yaşağan Ukraina vatandaşları karantin vaqtında ya da kiriş-çıqış nezaret etüv noqtaları çalışmağan arada Ukraina Nazirler Şurası tarafından belgilengen insaniy sebeplerden vaqtınca işğal etilgen Ukraina topraqlarına kiriş-çıqıs tertibini bozsalar, memuriy mesüliyetke çekilmeycekler.

Böyleliknen, 16 yaşını toldurmağan bala anası ya da babası (onı evlâtlıqqa alğan kişi), vasiyi, ya da başqa qanuniy temsilcilsiniñ refaqatında şahısını belgilegen ve Ukraina vatandaşlığını tasdıqlağan vesiqalarnı resmiyleştirüv maqsadınen; yaşağan yerlerine qaytqan Ukraina vatandaşları ve olarnıñ qoranta azaları; yaqın aqrabaları ağır hasta olğan, ya da vefat etken şahıslar; şiddetli ve/ya da hronik (şu cümleden, insulinge bağlı diabet, kanser, antiretroviral, antituberkulöz) hastalıqlarınıñ tedaviylenmesine, ilaç ve tıbbiy cihazlarnen temin etilmesine muhtac olğan şahıslar; qorantalarına qavuşacaq şahıslar, daimiy şekilde ya da vaqtınca başqa devlette yaşağanına dair vesiqaları olğan ve vaqtınca işğal etilgen Ukraina topraqlarından keleyatqan şahıslar kiriş-çıqış nezaret etüv noqtasını keçe bile.

Böyle müim insaniy qararnı işlep çıqaruvnen qabul etilmesine alâqası olğan er keske minnetdarlığımıznı bildirip, qanun derc etilmesinden soñ ekinci künü amelge keçmesine bekleymiz.