Rusiye Federatsiyası vaqtınca işğal etilgen Qırım Muhtar Cumhuriyeti ve Aqyar şeeri topraqlarında cinayetlerini işlemege devam ete, olardan biri – Ukraina devletine ait olğan ”Massandra” Milliy istisal-agrar birleşmesiniñ qanunsız şekilde elde etüvdir.

2020 senesi ekim ayınıñ soñunda Ukraina Prezidentiniñ Qırım MC-deki Temsilciligi, 2014 senesi qara qışnıñ 1-nece Ukraina Agrar siyaseti ve aşayt nazirligine ait olğan ”Massandra” Milliy istisal-agrar birleşmesi” Devlet kontserniñ Rusiye Federatsiyası tarafından qanunsız şekilde “milliyleştirilgenine” dair malümatnı Qırım Muhtar Cumhuriyeti ve Aqyar şeeri Prokuraturasına taqdim etti. 

Temsilcilik tarafından teslim etilgen bütün malümatlar teşkerilip, mütenasip cinaiy davalarğa qoşula.

Mahkemeden evelki tahqiqat esnasında vaqınca işğal etilgen Qırım MC ve Aqyar şeeri topraqlarında qanunsız şekilde teşkil etilgen sözde ”Qırım Cumhuriyeti Devlet Şurası”, ”Qırım Nazirler Şurası” ve başqa qanunsız akimiyet organlarınıñ vekilleri devlet şirketleriniñ ve müessiseleriniñ balansında bulunğan mal-mülkni ”milliyleştirüv” ve satuv yolunen devletke büyük miqdada zarar ketirgeni aqqında belli oldı.

2020 senesi ekim ayınıñ 14-de sözde ”Qırım Cumhuriyeti Devlet Şurası” «Qırım Cumhuriyeti Devlet Şurası tarafından 2019 senesi boş aynıñ 6-da qabul etilgen ”Qırım Cumhuriyetiniñ devlet mülkiyetine ait mal-mülkni şahsiyleştirüvge dair 2020 senesi içün tahminiy plannı (programmanı) qabul etüv aqqında” 143-2/19 sanlı qararnamege deñişmeler kirsetüv aqqında» 526-2/20 qararnamesinen ”Massandranı” 2020 senesi tahminen şahsiyleştirilecek obyektler cedveline kirsetken edi. Bundan soñ işğalci akimiyet şahsiyleştirüv mezat vastasınen kerçekleştirilecegi aqqında qarar aldı. 

”Massandranı” sattıracaq mezat işğalci akimiyet tarafından 2020 senesi ilk qış ayınıñ 14-ne planlaştırıldı.

Aynı vaqıtta Ukraina Prezidentiniñ Qırım MC-deki Temsilciligi işğalci devlet RF tarafından işlengen cinayetlerge siyasiy-diplomatik yolnen tesir etmek ricasınen Ukraina Çetel işler nazirligine muracaat etti.

Temsilcilik RF akimiyeti tarafından işğal etilgen topraqlarda işlengen yañı cinayetni taqbih ete.

Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina nazirligi, Ukraina Çetel işler nazirligi, Qırım Muhtar Cumhuriyeti ve Aqyar şeeri Prokuraturası ile sıqı işbirlikte Temsilcilik ”Massandra” Milliy istisal-agrar birleşmesiniñ qanunsız şekilde elde etüvge alâqaları olğan şahıslarnıñ mesüliyetke çekilmesi ve olarğa qarşı sıñırlayıcı tedbirlerniñ (sanktsiyalarnıñ) qabul etilmesi içün qolundan kelgenini yapacaqtır.

Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina nazirliginiñ vaziyetke dair fikiri ile bu yerde tanış olmağa mümkündir: : https://mtot.gov.ua/…/prichetni-do-zahoplennja-masandri…