2018 senesi boş ay (noyabr) 23 künü Temsilcilikteki haber-talil hızmetiniñ baş mesleatçısı Alla Rakşa Milliy hatıra ukrain institutı tarafından azırlanğan ‘‘Birinci şahıs adından Maydannıñ regional ölçevi’’ serlevalı yekünleyici hatırlavlar kitabınıñ taqdiminde iştirak etti.

Tedbirde Milliy hatıra ukrain institutında ağzaviy menbalarnı esap ve saqlav bölüginiñ reisi Tetâna Kovtunovıç, ‘‘Maydan: ağzaviy tarih’’ leyhasınıñ regional yazuvlar yöneticisi Tetâna Prıvalko, Herson vilâyeti devlet memuriyetinde iqtisadiy inkişaf ve ticaret bölüginiñ müdiri Dmıtro Butriy, hatırlavları taqdim etilgen kitapqa kirgen ikâyeciler, ilmiy saanıñ vekilleri, maarifçiler, din adamları ve cemaat iştirak etti.

‘‘Birinci şahıs adından Maydannıñ regional ölçevi’’ neşiri Ukraina regionlarınıñ sayısına teñ olıp, 25 bölükten ibaret. Umumen alğanda, içine Maydanğa alâqaları olğan 250 ikâye, fotoresimler ve resmiy vesiqalar kirsetilip, şu adiselerni tolu şekilde körmege ve olarğa qıymet kesmege imkân yarata.

Ayrı bir bölük olaraq neşirge ‘‘Evromaydan-Qırım’’ iştirakçileriniñ hatırlavları kirdi. Tertip eticiler aytqanlarına köre, vaqtınca işğal etilgen Qırımdan köçkenler, işğal etilgen topraqlarda yaşamağa devam etken tuvğanları içün qorqıp, intervyu davetlerge çeşit türlü cevaplar berdiler, amma olarnıñ büyük qısımı iştirak etmege razı oldı. Öz aqlarını qorçalamaq, kerçek Menlik inqlâbını yapmaq ve Qırım yarımadasınıñ Avropağa ıntıluvını numayış etmek içün fikirdeşlerinen beraber qırımtatar ve ukrain bayraqları ile Qırım meydanlarına çıqqan 12 qırım faalciniñ ikayeleri yazıldı.

Taqdimde Qırımdan, Herson, Zaporijya ve Nıkolayiv vilâyetlerinden faalciler Maydan adiselerini bir kere daa hatırlap, Menlik inqlâbı aqqında hatırlavları ve fikirleri ile paylaştılar.