Bugün, berim ayınıñ 30-da, Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Tamila Taşeva ”Ukrainada memleket içinde avuşuv: zemaneviy çağıruvlar ve ümüt berici çezilüvler” forumınıñ ”Memleket içinde avuşuv ceetinden keçici devirde adalet meselesi” mevzusındaki bölüginde iştirak etti.
Tedbirniñ teşkilâtçıları: Avropa Şurasınıñ Ukrainadaki Ofisi – Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlik
Tedbirniñ diger iştirakçileri:
– Dmıtro Lubinets, Ukraina halq deputatı, insan aqları, vaqtınca işğal etilgen Donetsk ve Lugansk vilâyetlerinde, Qırım Muhtar Cumhuriyetinde ve Aqyar şeerindeki Ukraina topraqlarını işğalden azat etüv ve ğayrıdan integratsiya etüv, milliy azınlıqlar ve halqara munasebetler meseleleri boyunca Ukraina Yuqarı Şurası Komitetiniñ başlığı;
– Stepan Zolotar, Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlikteki Barışıqnı quruv müdirliginiñ müdiri;
– Olena Fonova, ”Uquq Justice” AB Leyhasınıñ Donbas regional islâatlar şurasınıñ yöneticisi, Lugansk vilâyeti Hocalıq mahkemesiniñ mahkemecisi;
– Alöna Lunöva, ZMİNA insan aqları merkeziniñ aq qorçalayıcısı, Ukraina Prezidenti yanındaki uquqiy islâat meseleleri Komissiyası iş gruppasınıñ kâtibi;
Moderator: Yuna Potömkina, Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazir – Ukraina Baş naziri Oleksiy Reznikovnıñ mesleatçısı.
Tamila Taşeva öz çıqışını memleket içinde avuşuv ve vaqtınca işğal etilgen Qırımnı işğalden azat etüv ve ğayrıdan integratsiya etüv meselelerine bağışladı.
”Biz daimiy şekilde vaqtınca işğal etilgen topraqlarnıñ sakinlerine ve memleket içinde avuşqan şahıslarğa qol tutamız, mesleatlar beremiz. Soñki 2 yıl içinde 9 biñge yaqın muracaatqa cevap berildi. Amma bu, faaliyetimizniñ yekâne yönelişi degildir.
Silâlı dava qurbanlarınıñ bozulğan aqlarını ğayrıdan tiklev, Rusiye Federatsiyasınıñ Ukrainağa qarşı silâlı davası neticesinde maddiy ve maddiy olmağan zararlarnıñ tazminatı içün uquqiy esaslarnı azırlav, silâlı dava esnasında aqlarnıñ bozuluvına kelecekte yol bermemek içün mütenasip vastalarnı işlep çıqaruv keçici devirde adaletniñ müim qısımları ve memleket içinde avuşqan şahıslarnıñ aqlarını qorçalav ve ğayrıdan tiklev ceetinden pek mümdir”, – dep qayd etti öz çıqışında Tamila Taşeva.
Temsilcilikniñ faal iştiragi ile amelge keçirilgen muayyen adımlar arasında Ukrainada silâlı davanıñ aqibetlerini aşmaq ve kelecekte onıñ tekrarlanmamasına yol bermemek maqsadınen memleket içinde avuşqan şahıslarnıñ aq-uquqlarına diqqat ayırğan keçici devirde adaletniñ milliy şekli leyhasınıñ azırnmasını qayd etmege mümkündir.
Daimiy Temsilciniñ muavini Ukraina Prezidentiniñ «”Vaqtınca işğal etilgen Qırım Muntar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvge dair devlet strategiyası aqqında” Ukraina milliy mudafaa ve havfsızlıq Şurası tarafından 2021 senesi saban ayınıñ 11-de qabul etilgen qarar aqqında» Fermanına ayırıca diqqat ayırdı. İşbu vesiqanıñ maddelerine binaen, vaqtınca işğal etilgen topraqlarnı işğalden azat etüv ve havfsız şekilde ğayrıdan integratsiya etüvge dair devlet siyasetiniñ maqsadlarından biri, keçici devirde adaletniñ uquqiy esaslarını belgilevdir. Bundan ğayrı, Strategiyada vaqtınca işğal etilgen topraqlarnı ğayrıdan integratsiya etüvniñ şartları, şu cümleden, memleket içinde avuşqan şahıslarnıñ problemalarını çezüv olğanı, Ukraina ise memleket içinde avuşqan şahıslarnıñ aq-uquqlarını ve qanuniy menfaatlarını kefil etkeni açıq-aydın şekilde qayd etilgendir.
”Qırım platformasınıñ qurulış Sammiti vaqtında Temsilcilik tarafından eñ yüksek seviyede memleket içinde avuşqan şahıslar meselesi köterilgen edi. Qırım platforması Ofisiniñ faaliyeti hususan işbu vatandaşlar içün qıtaiy Ukraina topraqlarında oñaytlı şartlarnıñ yaratıluvı içün Ukrainanıñ ecnebiy ortaqlarından yardımnıñ celp etilüvini maqsat etip qoyğandır.
Bu, mütenasip yönelişlerde Temsilcilik tarafından nazirlikler ve başqa devlet organları, cemaat teşkilâtları ile işbirlikte alınıp barılğan faaliyetniñ kiçik parçasıdır”, – dep ikâye etti Tamila Taşeva.
Teşkilâtçılarğa memleket içinde avuşqan şahıslarnıñ problemalarına diqqat ayırğanları ve Qırım Muhtar Cuhuriyeti ile Aqyar şeeri topraqlarını işğalden azat etüv ve ğayrıdan integratsiya etüv ile bağlı müim meselelerniñ müzakere etilüvini teşkil etkenleri içün minnetdarlığımıznı bildiremiz.