2019 senesi qural ay (mayıs) 21 künü Kıyiv şeerinde ”Memleket içinde köçüv meseleleri boyunca uquqiy temelni, mahkeme ameliyatını ve trening programmalarını mükemmeleştirüv” mevzusında halqara konferentsiya olıp keçti, tedbirni 2018-2021 seneleri içün AŞ Ukraina içün areket planı çerçivesinde Ukrainada Avropa Şurasınıñ Ofisi teşkil etip, mütenasip yerli nazirliklerniñ, idarelerniñ ve teşkilatlarnıñ vekillerini, bu cümleden Ukraina Prezidentiniñ Qırım MC Temsilciliginiñ hadimlerini, mahkemecilerni, halqara teşkilatlarniñ temsilcilerini, adlliyeci ile ekspertlerni davet etti.

Konferentsiya esnasında Ukrainada memleket içinde köçken şahıslarnıñ aktual meseleleri, devletimizde insan aqları boyunca ameldeki qanuniyetni eyileştirüv, milliy mahkemelerniñ faaliyetini ve memleket içinde köçken şahıslar boyunca trening programlarını mütenasip tevsiyelernen Avropa Şurasınıñ standartlarına ketirüv meseleleri aydınlatıldı ve muzakere etildi.

1951 senesi qabul etilgen Jeneva Konventsiyası imayesinde bulunğan qacaqlardan farqlı olaraq, memleket içinde köçken şahıslar yerine ketiririlmesi şart olğan iç bir türlü halqara adliy vesiqanen qorçalanmağanları qayd etildi. Neticede, memleket içinde köçken şahıslarnıñ qorçalanması esasen Ukrainağa bağlı, bunıñ içün bu vatandaşlar devletniñ maqsatlı yardımına muhtaclar.